Una asociación uvieista convoca un concursu de rellatos alredor del fútbol

"L'Asociación d'Uvieistes Espíritu 2003 convoca un concursu lliterariu de rellatos curtios qu'espresen el sentimientu de los aficionaos del club de fútbol Real Uviéu na temporada 2003-04, añu en que l'equipu sufrió'l descensu alministrativu que lu llevó a tercera división. L'asociación azul quier con esti certame recuperar les vivencies de tolos aficionaos del equipu que lu acompañaron naquel intre especialmente difícil. Con un tope de 10 páxines y d'hasta trés rellatos por participante, el plazu pa presentar trabayos a esti concursu ta abiertu hasta'l 29 de febreru de 2008. El premiu va conocese'l 26 de Marzu, y va consistir nuna cena pa dos persones nun restaurante d'Uviéu, pudiendo dase hasta tres accesits, que recibirán una camiseta firmada d'un xugador del Real Uviéu. Los participantes puen unviar los sos trabayos a la direción de corréu espiritu2003@gmail.com, presentándolos na mesa que tien l'Asociación nel Nuevu Carlos Tartiere los díes de partíu o nel Partaz de Correos 5.108 (33080, Uviéu)."