Los grupos Efectos Personales, La Familia Culebra, Memphis Bell y Trujas son los finalistes del Concursu de Maquetes Pop-Rock 2015

El ganador va decidise nel conciertu que se va facer mañana, na sala Tribeca d’Uviéu, a partir de les 20.30 hores. La entrada ye llibre y gratuita y cada banda va disponer de 25 minutos pa tocar los sos temes.

El grupu ganador del Concursu de Maquetes Pop-Rock 2015, qu’entama l’Institutu Asturianu de la Mocedá en collaboración con 40 Principales Asturias, va grabar un CD cola compañía discográfica asturiana que nel so momentu se determine y va realizar tamién una xira de presentación.

    Efectos Personales. El grupu ta formáu por cinco músicos: David Rodríguez (batería), Rod Feijoo (guitarra), María González (voz), Víctor de la Cera (baxu) y Luis Fernando Chacón (teclaos). La banda grabó los sos primeros cantares l’añu pasáu. Clasificáronse en segunda posición nel CIDISI Music Festival y foron finalistes nel Xixón Sound Festival y nel concursu de maquetes de 40 Principales.
    La Familia Culebra. El grupu surdió va trés años y ta formáu por Jesús González Lorenzo (voz y guitarra), Matías Vega (baxu y coros), Juan Diego Yera (guitarra y coros) y Carlos Pérez Cuenco (batería).
    Memphis Bell. Formáu por Mary Kay Mass (voz, guitarra y composición), Agustín Quiñones (guitarra y composición), Rufino Vigil (baxu) y Iris Martínez (batería). La banda foi semifinalista nel Xixón Sound Festival y el FestiAmas nel 2013 y nel Rock Ciudá d’Uviéu y Hard Rock Rising de Madrid nel 2014.
    Trujas. Pelayo Gallego Suárez (voz, gaita y guitarra), Eduardo Riol Dueñas (voz y guitarra), Larva Varela Fernández (batería y harmónica), Pablo Martínez García (baxu y voz) y Diego Prieto Gutiérrez (guitarra y coros) formen esta banda.

La Conseyería de Presidencia y Participación Ciudadana, al traviés del Institutu Asturianu de la Muyer y Polítiques de Mocedá, convocó’l Concursu de Maquetes Pop-Rock 2015 dientro del programa Culturaquí. Nesti certame, que superó yá les 31 ediciones, participaron hasta agora 800 grupos. Amás, editáronse 56 discos y celebráronse más de 200 conciertos colos grupos ganadores.