Pídese a la Xunta Xeneral l'apoyu a la Querella Arxentina

La Comuna d'Asturies propón a la Xunta Xeneral l'aprobación d'una Proposición non de Llei de condena del franquismu y d'apoyu a la querella que se sigue dende Arxentina por xenocidiu.

La Comuna d'Asturies, plataforma asturiana que participa na Coordinadora estatal d'Apoyu a la Querella Arxentina contra Crímenes del Franquismu (CeAQUA), reunióse nos últimos meses del 2015 colos grupos parllamentarios de la Xunta Xeneral pa propone-yos llevar al Plenu l'aprobación d'una Proposición non de Llei de condena del franquismu y d'apoyu a la querella que se sigue dende Arxentina por xenocidiu y/o crímenes de lesa humanidá cometíos nel Estáu Español pola dictadura franquista. Trátase de la única causa xudicial contra'l franquismu abierta nel mundu.

Depués de tener reuniones con representantes del Grupu Socialista, Podemos, Izquierda Xunida y Grupu Popular (nin Foro Asturias nin Ciudadanos respondieron a les peticiones de reunión), los trés primeros grupos mostráronse favorables a apoyar la propuesta, de manera que se pueda votar nel Plenu posiblemente a primeros d'esti mes de febreru. Dende La Comuna d'Asturies insistióse en tou momentu en que los grupos favorables se punxeren d'alcuerdu pa llevar una mesma postura consensuada. Nel testu de la proposición non de llei, que ye asemeyada na so fundamentación a les que yá aprobaron los parllamentos del País Vascu, Cataluña y Andalucía, esplícase l'oxetivu represivu del golpe d'Estáu de 1936 y les circunstancies de la dictadura posterior, que vulneró los más elementales derechos humanos ensin que, hasta la fecha, les víctimes llograren xusticia nenguna. Apúntense los datos sobre la represión n'Asturies, con cifres que tán ente los 7.000 y 9.000 muertos (ente víctimes civiles de la guerra, asesinaos, fusilaos y fallecíos en prisión).

Tamién se recuerda la calificación d'estos fechos por parte de la ONU y Amnistía Internacional como violaciones de los derechos humanos y crímenes contra la Humanidá. Analízase depués la fundamentación xurídica internacional que garantiza la imprescriptibilidá d'esos delitos y conclúyese que la llei d'amnistía española tresgrede los principios xenerales del derechu internacional y vulnera pactos internacionales de cumplimientu obligáu soscritos por España, polo que nun se puen torgar les acciones xudiciales qu'investiguen los crímenes cometíos pol franquismu, como ye'l casu de la llamada Querella Arxentina, más cuando la Xusticia española negó cualquier intentu de facelo nos sos xulgaos. La Proposición non de llei pide a la Xunta Xeneral que denuncie la sublevación militar dirixida por Franco, la guerra qu'acabó colos gobiernos democráticos y el réxime dictatorial posterior. Pídese amás que se garantice'l derechu que tienen les víctimes y los sos familiares, aparte de tola sociedá, a conocer la verdá sobre aquellos fechos, a una xusticia efectiva qu'acabe cola impunidá y a una reparación digna.

Tamién pide l'apoyu de la Xunta Xeneral a la Querella 4591/10, del Xulgáu n.u 1 de Buenos Aires (República Arxentina), por delitos de xenocidiu y lesa humanidá contra los responsables de la vulneración de los derechos humanos nel franquismu, amás d'animar a la ciudadanía y a los Conceyos a sofitala, bien personándose como querellantes quien foron represaliaos o bien manifestando la so denuncia de la dictadura y la so adhesión a la querella.