Asturies asítiase como ún de los principales destinos nes redes sociales

Asturies zarró 2015 como tercer destín turísticu en redes sociales. El Principáu algamó a finales d'añu 226.053 siguidores nos sos perfiles de redes sociales, un 83,44 % más que l'exerciciu anterior.

Esti datu reflexa la gran relevancia de la comunidá como destín turísticu n'internet, tres el refuerzu de les acciones impulsaes pola Conseyería d'Empléu, Industria y Turismu.

El Principáu asítiase ente los destinos turísticos autonómicos con más siguidores. Ocupa'l segundu puestu en Facebook (165.592 siguidores) y en Google + (1.916 siguidores), el terceru en Instagram (9.313) y Youtube (1.804), el cuartu en Pinterest (964) y el quintu en Twitter (46.464).

Otramiente, el portal turísticu www.turismoasturias.es atropó en 2015 1.677.891 visites úniques, más del doble de les recibíes l'añu anterior. El tráficu xeneráu por busques directes ensin sofitu publicitariu supunxo'l 53,02% del total y el que se realiza dende les redes sociales algamó'l 19,73%.

El 92,43% de les visites a la web www.turismoasturias.es faise dende España y la comunidá de Madrid ye la que mas xenera, con más de 406.000.

Amás, les visites internacionales al portal aumentaron un 19,19% en 2015 en comparanza col exerciciu anterior. Francia ye'l país dende'l que se xeneren más busques, con un total de 18.140, siguíu d'Alemaña, con 13.783, y Reinu Uníu, con 13.043.