La primer vuelta de les elecciones al Rectoráu de la Universidá d'Uviéu va celebrase'l 15 d'abril

"El 15 d'abril ye la fecha propuesta pol actual rector de la Universidá d'Uviéu, Juan Vázquez, pa celebrar les elecciones a esti cargu xestor de la institución académica asturiana. Asina va proponelo a la Xunta Electoral, que va ser la que dea'l permisu definitivu, anque tou paez indicar qu'asina va ser. Vázquez anunció güei públicamente la so decisión nel actu de toma de posesión de los once nuevos catedráticos, cuatro profesores titulares y dos vicerrectores: Miguel Ángel Comendador y María Jesús Cañal, que sustituyen a Santos González y Antonio Cueto, acabantes de dimitir pa participar nes elecciones rectorales.

Comendador, hasta agora vicerrector de Converxencia Europea, Postgráu y Titúlos Propios, sustitúi al anterior vicerrector Antonio Cueto al frente de la cartera d'Ordenación Académica, creándose'l nuevu cargu de vicerrector d'Actividá Académica, Profesoráu y Títulos Propios. Cañal asume la cartera d'Estudiantes y Cooperación, hasta güei xestionada por González. Al respecto de los comicios, Vázquez adelantó que la campaña electoral va entamar una vez acaben les vacaciones de Selmana Santa y va finar tres selmanes dempués cola celebración de la primer vuelta, el día 15 d'abril. Va ser convocada oficialmente'l día 1 de marzu. La elección d'estes feches débese a la intención de que'l procesu electoral universitariu nun coincida colos comicios xenerales que van tener llugar el 9 de marzu. En casu de que nengún de los hasta agora cuatro aspirantes confirmaos (Antonio Cueto, Santos González, Vicente Gotor y Paz Andrés) llogren más de la mitá de los votos ponderaos, que paez ser lo más probable, va celebrase una segunda vuelta. La Xunta Electoral va ser la encargada de decidir la fecha de la mesma, que va tener llugar nun plazu máximu de 15 díes pasaos tres la primer votación.

Respecto a la dimisión de González y Cueto pola so presentación a les elecciones, Vázquez esplicó que ""nun yera necesaria, pero entendimos que yera un mou de dar exemplu, establecer unos principios y preservar la xestión rectoral"". A dambos, el rector espresó-yos la so gratitú pol so esfuerciu. Pidió que sigan trabayando a favor de la Universidá y ""consolidar el so carácter progresista"". De la mesma manera, agradeció al vicerrector d'Investigación, Pedro Sánchez Lazo, quien baraxó hasta esta mesma selmana presentase a los comicios, la so non participación nel procesu electoral, por ""renunciar a aspiraciones personales"" pa siguir trabayando na Universidá. ""Ye dalgo digno de reconocer y valorar"", añadió."