Suatea denuncia que'l Principáu quier desaniciar 276 puestos de trabayu na enseñanza

"El Sindicatu d'Enseñanza Suatea alvirtió ayeri, n'acabando la reunión de la Mesa Xeneral de la Función Pública, que'l Gobiernu asturianu ""pretende eliminar"" 276 puestos de trabayu na enseñanza pública suprimiendo 71 unidaes n'infantil y primaria ""incluso en zones tán creciendo demográficamente"".

Suatea considera que les midíes que tan cociendo suponen una ""reconversión"" na enseñanza pública non universitaria asturiana y un ""ataque grave a la escuela de toos y toes"". El sindicatu denunció que ""l'Alministración asturiana nun quier testigos incómodos que vean cómo se destruye la rede pública mientres se-yos llena la boca falando del estáu del bienestar"". Suatea esplica como ""El Gobiernu mostró'l so despreciu a la Xunta Xeneral y los docentes, procediendo a convocar un grupu de trabayu de la Mesa Xeneral de la Función Pública, onde los docentes tamos representaos como tales, pa tratar de condiciones llaborales y de la supresión o creación de puestos de trabayu"". Según SUATEA, en Secundaria van suprimise 186, y 90 en Primaria y Infantil que se reparten ente 29 n'infantil, 52 en primaria, y el restu n'Inglés, Educación Física, Música y Audición y Llinguaxe. Suatea critica que en Secundaria desapaecen 17 places de la especialidá de Música, 13 de dibuxu, 16 de Física y Química, 15 de Tecnoloxía, 14 de Matemátiques, 14 de Llingua Castellana, 14 de Filosofía, 12 d'Educación Física y 11 d'Inglés más otres 22 en Xeografía y Historia, mientres que se creen otres 27 nos centros de Formación Profesional en materies como Economía y Cultura Clásica, ello dempués de suprimir les places de llatín y griegu.

El sindicatu aseguró que va desapaecer ufierta de Formación Profesional en zones completes d'Asturies, mientres que, en Primaria y n'Infantil va menguase'l númberu de profesores d'apoyu y eliminase los correspondientes a atención a la diversidá anque nun se prevea reducción d'unidades."