La XDLA nun ve cambiu nengún na RTPA con respeuto al idioma
|
7 Xineru, 2016 por Redacción
- Inicie sesión o rexístrese pa espublizar comentarios
"Empezamos 2016 y la situación sigue igual, col asturianu arrequexao na programación", afirmen dende'l coleutivu cívicu.
La Xunta pola Defensa de la Llingua Asturiana (XDLA) ve que l'inaición del Gobiernu cola RTPA y la xestión "desastrosa" d'Antonio Virgili "faen peligrar a la cadena pública", que más que n'Asturies "podría emitir guapamente en Valladolid o en Toledo", lo que lleva a que la canal tenga índices d'audiencia más que baxos. A ello tamién ayuda que la TPA dea'l llombu a la cultura asturiana, emitiendo na tarde del martes un conciertu de la cantante sevillana Tamara en llugar del de cualquier grupu asturianu o inclusive 'Sones de Navidá', "una gala celebrada en Grau centrada na música tradicional de la Navidá y que RTPA nun emitió".
He equí'l comunicáu completu de la organización:
Ximo Puig, presidente socialista de la Generalitat valenciana, afirmó hai meses que pal valencianu, RTVV yera una cuestión de vida o muerte, “porque ye una llingua qu'aguantó tres sieglos ensin oficialidá, pero que nun pue aguantar agora ensin televisión”. Les palabres del líder del socialismu valencianu choquen cola situación d'Asturies, onde PSOE, PP y IX punxéronse d'alcuerdu pa renovar l'equipu xestor d'Antonio Virgili, los mesmos que se nieguen a normalizar l'usu del asturianu nes emisiones. Y ye qu'empezamos 2016 y vemos que, a pesar de les palabres, la situación sigue igual, col asturianu arrequexao na programación y onde nun se cumple nin la llexislación llingüística vixente nin la toponimia oficial. La ineptitú de Virgili y les sos manes dereches -amás d'una Conseyería de Presidencia y otra de Cultura que paez que nun quieren o nun saben nesti asuntu- fai que TPA pieslle l'añu con un 5,2% de media, 0,6 puntos menos que l'añu pasáu. Amás, la cadena empezó'l 2016 con un mínimu históricu del 4%.
Son unos datos a los que van tener que responder los que fixeron l'apueste por renovar ¡pa seis años! al equipu xestor que llevó a los medios públicos a esta situación: la de la desconexón dafechu cola sociedá asturiana. Asistimos plasmaos a una televisión onde l'usu del idioma ye, amás de marxinal, diglósicu, vulgar, rural y folclóricu. El folclore ye interesante y necesariu porque ye parte de la nuestra cultura, pero tamién ye necesario mostrar que l'idioma propiu pue ser vehículu pa falar d'una cultura moderna, urbana, contemporánea, critica y profesional. Nun se pue facer namás una televisión de fiestes y folclore rural. Un exemplu ye la programación de Navidá, onde RTPA perdió la oportunidá d'aprovechar la potencia simbólica d'unes feches tán señalaes, porque la programación especial val p'afitar la marca de la televisión, nesti casu de televisión asturiana.
¿Pa qué se reponen series infantiles doblaes al nuestru idioma ensin facer nenguna promoción? Va tar malo de qu'estos productos tengan una mínima audiencia si s'emiten ensin avisar ¡nuna canal onde l'espectador mediu tien más de 50 años! Ye una xugada que muestra lo “partidarios” que son los xestores que nos impunxeron. La única “novedá” foi la repetición de delles películes doblaes al asturianu -ye de reseñar qu'en tol añu 2015 nun se trabayó en nengún doblaxe al nuestru idioma, porque RTPA quier más pagar a empreses de Madrid y multinacionales de Hollywood-. A pesar de que dalguna de les películes yá tuvieron cinco pases, les dos producciones axuntaron en total a 30.000 espectadores. Por exemplu, una película de la saga de Harry Potter emitida en castellanu -saga que venimos solicitando que se doble al asturianu- tuvo 6.000 espectadores. Los datos muestren lo necesario que ye que'l doblaxe sía estratéxicu como exe de la normalización.
Sicasí, Antonio Virgili y el so equipu parez que nun aprienden, quieren siguir nel so puestu xugando a dirixir una televisión que podría emitir guapamente en Valladolid o en Toledo, esbaratando'l presupuestu mentes lleven un sueldu bien curiosu como premiu. Y ye que nesta tarde del 5 de xineru -con repetición al otru día- TPA va emitir un conciertu de la cantante sevillana Tamara. Lo lóxico -lo coherente, lo que manda la llexislación- sería centrase na música asturiana y non nuna cantante que yá tien TVE o Tele5 pa promocionase, pero RTPA y Virgili quieren más a Tamara. Non, na nuestra televisión nun vamos ver a Tejedor, Tuenda, Dixebra, Los Berrones, Toli Morilla o a los Sones de Navidá, una gala celebrada en Grau centrada na música tradicional de la Navidá y que RTPA nun emitió. De la mesma manera, col 2016 ya s'empiecen a anunciar programes nuevos, pero nada sabemos d'espacios nel nuestru idioma, situación a la que van tener que responder los que se comprometieron a normalizar l'usu del asturianu en RTPA y esos que se nieguen a cumplir cola llexislación vixente.
Efrén d'Andrés
