Andecha esixe al Executivu un “cambiu radical” na política forestal

La fola de quemes que vivió’l país los últimos díes, con incidencia especial el sábadu, lleva a Andecha Astur a esixir al Gobiernu un “cambiu radical” na política forestal. Reclama’l fin del monocultivu d’especies alóctones que faciliten la propagación del fueu.

“Amás de los daños medioambientales qu’el so mesmu llantíu provoca suplantando al monte autóctonu asturianu, convierten los nuesos montes n’auténtiques tees gracies a la resina de los pinos y los alcoholes y los aceites de los ocalitos”, afirmen los nacionalistes, que tamién consideren necesariu “l’entamu de los trámites llegales precisos pa la devolución de los montes comunales a los sos llexítimos dueños, de los que s’apoderó nel so momentu les estintes Dirección General de Montes y l’ICONA; non sólo porque ye de xusticia qu’asina seya, sinón tamién nel convencimientu de que nel momentu que los mesmos reviertan a los sos llexítimos propietarios, vinculándose de forma estricta al usu tradicional del mesmu, van gociar d’una atención y unos curiaos que van evitar en bona midida la profusión d’incendios”.

D’igual forma, Andecha Astur critica la falta de prevención por parte de la Conseyería de Desarrollu Rural y Recursos Naturales “magar saber que la mayoría d’ellos (83 por ciertu) tienen por oxetu l’aniciu y rexeneración de camperes pal ganáu”. “Per otra parte la pusilanimidá y sucursalismu del ‘Principado’ y los partíos políticos nelli representaos son la causa de que non supieren llantar cara a la nueva Llei de Montes aprebada en Madrid en xineru del presente añu, que dexa recalificar los tarrenos quemaos nos incendios forestales –na anterior normativa esta recalificación taba prohibida fasta los 30 años– supon tou un acicate pa la quema de los mesmos”, añaden los nacionalistes.

Por último, esixen un cambiu d’actitú del Gobiernu con respeuto a les demandes de los bomberos asturianos: “Los recientes incendios punxeron n’evidencia que nun ye de recibu l’actitú del ‘Principado’ nel conflictu que caltien colos bomberos y urxe a un diálogu abiertu colos mesmos, nos que prime la necesidá d’entendimientu frente a la prepotencia de la que fai gala’l ‘Principado’.