Ministeriu y Principáu acuten 582 millones del Plan Nacional de Calidá de les Agües

"El Principáu d'Asturies tornó güei na primer comunidá autónoma en firmar col Ministeriu de Mediu Ambiente'l conveniu del Plan Nacional de Calidá de les Agües (2007-2015). Un alcuerdu que contempla 128 obres en 56 conceyos asturianos con una inversión de 582,1 millones d'euros y que supón ""un pasu decisivu en materia de saniamientu y abastecimientu"".

El conveniu firmáronlu ayeri n'Uviéu la Ministra de Mediu Ambiente, Cristina Narbona, el presidente del Principáu, Vicente Álvarez Areces, y el presidente de la Confederación Hidrográfica del Norte, Jorge Marquínez, nun actu celebráu nel hotel Reconquista. Vicente Álvarez Areces indicó que l'alcuerdu inclúi ""importantes obres d'interés xeneral ente les que destacó dos colectores pa Uviéu y Avilés y dos estaciones depuradores en Xixón este y el ríu Gafu. Según esplicó, de la inversión total, 296 millones va ser aportaos pol Ministeriu de Mediu Ambiente y los 286 millones restantes van ser financiaos pol Gobiernu del Principáu. ""Les obres van beneficiar a prácticamente la totalildá de los conceyos del Principáu"", indicó Areces, que resaltó qu'a esta cantidá hai que sumar los 20 millones d'inversión en Picos, lo que fai que se destinen más de 600 millones a actuaciones en materia medioambiental.

El xefe del Executivu destacó que'l Principáu, dende qu'asumió en 1985 les competencies en materia d'abastecimeintu y saniamientu, ""tornó la política de xestión de les sos agües nel centru del so modelu de desarrollu mediuambiental"". Pela so parte, la ministra de Mediu Ambiente, Cristina Narbona, destacó na so intervención que los recursos destinaos a la meyora de la calidá de les agües y l'abstecimeintu proceden del ""esfuerciu tributariu de los ciudadanos, españoles y europeos"", polo que fizo un llamáu a los empresarios asturianos pa qu'incorporen tecnoloxíes meyores na so actividá productiva y baxen la contaminación que producen n'orixe. Al so xuiciu hai que reiterar que güei toles empreses deben comprometese a incorporar les tecnoloxíes que reduzan al máximu la contaminación y destacó la importancia de que toles empreses se sientan implicaes nesti asuntu. ""Hai una preocupación llóxica per parte de la ciudadanía polos vertíos producíos na ría d'Avilés, y eso significa qu'ámas de facer l'emisariu que ya s'executa les empreses qu'echen sustancies al estuariu y a los cauces tienen d'incorporar sistemes internos de depuración"", dixo Narbona.

Cristina Narbona anunció amás la firma d'otru conveniu de collaboración ente'l Ministeriu de Mediu Ambiente y el Gobiernu del Principáu pa la recuperación de les sendes y caminos qu'atraviesen Asturies y ""ponen en valor el Patrimoniu Natural asturianu"". Esti alcuerdu va firmase ""darréu"" en Madrid y va suponer una inversión de 5,4 millones d'euros financiaos al 50 por cientu pol Gobiernu d'España y el Principáu. Gracies a esti conveniu, al traviés de la Confederación Hidrográfica del Norte, va asumir el coste total de les obres d'interés xeneral por un importe de 139 millones, que van emplegase na construcción de colectores y estaciones depuradores d'agües residuales."