"Va yá pa dos años que Compromisu por Asturies decidió sofitar y participar nel procesu constituyente de Podemos Asturies, por entender qu’esi yera’l meyor camín pa superar un sistema políticu nel que los dos partíos mayoritarios foron garantes de los intereses de una minoría que s’arriqueció cola privatización de los servicios públicos y la eliminación de los drechos de la mayoría social.
Dende Compromisu tamién s’entendió nesi momentu que yera necesario qu’Asturies recuperare la so soberanía económica, política y cultural frente a les instituciones europees gobernaes por entidaes ensin cálter democráticu ningún y qu’esta necesidá solo podría algamase con un procesu d’empoderamientu popular y de la xuntura de los distintos actores de cambiu que se taben configurando alredor de la constitución de Podemos nel nuestru país.
Nel momentu que se tomó esa decisión, la militancia de Compromisu entamó a trabayar nos círculos de Podemos priorizando esti llabor sobre otros, col envís d’emburriar un cambiu políticu y social fondu que considerábemos prioritariu.
La decisión tomada en xineru de 2014 a la vista d’unes elecciones europees, anovóse el pasáu mes de mayu, cuando dende Compromisu sofitemos les candidatures de Podemos Asturies a la Xunta Xeneral, al siguir considerando qu’esta organización yera la ferramienta más afayadiza cola que cuntábemos p’avanzar na recuperación de derechos de la mayoría social y pa construir una Asturies digna, de xente digna, que tenga viabilidá como país, na que se respeten los principios de igualdá y de derechos sociales y llaborales, na que nun existan discriminaciones de xéneru, condición sexual, cultures o llingüístiques y na que seya posible vivir y construir un futuru.
Nesa mesma llínia Compromisu pidió’l votu a les candidatures d’unidá popular que se presentaron en dellos conceyos d’Asturies, porque formaben parte de los actores del cambiu políticu que tamién yera necesariu pa facer política municipal, la que ta más averada a la xente.
Cuando yá ta acabando l’añu 2015, dende Compromisu valoramos que nesti procesu hai lluces y solombres pero que l’apueste que fiximos foi correctu y pagó la pena, porque contribuyó a un cambiu de mentalidá, y de la forma de facer política, que sigue en marcha y nel que ye necesario afondar.
En Compromisu somos sabedores de que Podemos ye’l principal catalizador d’esti cambiu pero que, afortunadamente, los actores y protagonistes d’esti procesu nun acaben nesta organización, sinón que van más allá a traviés de la autoorganización y de les distintes candidatures de confluencia de persones y sectores que s’adapten a les circunstancies de cada ámbitu de trabayu.
Nesa llínia d’apertura, ampliación y adaptación al momentu y al llugar ye na que dende Compromisu por Asturies queremos trabayar pa da-y a la sociedá asturiana una ferramienta propia pa facela dueña del so futuru.
No que toca a la cita electoral del 20 d’avientu, la Xunta Nacional de Compromisu por Asturies, aconceyada en Candás el 28 de payares, decidió que la organización vuelva a pidir el votu pa les llistes que Podemos presenta n’Asturies, revalidando asina l’apueste fechu nel últimu Conceyu Nacional.
Facémoslo persabiendo que’l procesu d’elección de les llistes supunxo una contradicción colo que nós entendemos que tien que ser Podemos. El sistema escoyíu asumió una concepción centralista y poco respetuosa cola pluralidá del estáu que, dende’l puntu de vista de Compromisu por Asturies, nun entra dientro de los parámetros de la democracia y el respetu a la plurinacionalidá que Compromisu defende y qu’entiende que tán na base de la configuración de Podemos.
Sicasí, y en sen contrariu, valoramos mui positivamente la posición esplícitamente crítica del Conseyu Ciudadanu de Podemos Asturies con esti sistema, y la so posición de defensa de qu’Asturies decide sobre los asuntos que nos afecten a la xente asturiano, lo que da garantíes sobre l’articulación de Podemos nel nuestru país con una perspectiva asturiana y non sucursalista.
El 20 d’avientu va abrise un tiempu nuevu nel que van cambiar munches coses. Ye posible que se redefina la relación del estáu colos territorios y naciones que lu componen, en muchos planos; económicu, d’estatus xurídicu, cultural, llingüísticu…
Que Podemos saque un bon resultáu n’Asturies, ye perimportante pa que’l nuestru país tea presente nun procesu nel que Podemos va tener muncho que dicir y nel que Podemos Asturies ye importante que tenga voz propia. Poro, dende Compromisu pidimos el votu conscientemente asturianu pa les candidatures al Congresu y al Senáu de Podemos el 20 d’avientu".
