Virgili, confirmáu como direutor xeneral de RTPA

Aprobada tamién la composición del conseyu d'alministración del ente públicu.

44 de los 45 diputaos votaron nuna urna esta mañana nel Plenu de la Xunta Xeneral el nomamientu d'Antonio Virgili como direutor xeneral de la RTPA –cargu qu'ocupa en funciones dende'l 2011–, candidatu propuestu pola FSA-PSOE y sofitáu pol PP y IX. Al final, Virgili resultó escoyíu con 32 votos a favor y 12 en blanco. Pa ello necesitaba dos tercios de la Cámara.

Mentes, na votación del conseyu d'alministración el resultáu foi de 41 a favor y 3 en blanco. Los candidatos propuestos yeren Miguel Munarriz y Jessica Castaño (FSA-PSOE); Mercedes Fernández-Tresguerres y Julio García Cedrón (PP); Patricia Simón y Óscar Vega (Podemos); Vicente Bernaldo de Quirós (IX); y Jorge Fernández (Foro).

Hai que destacar que los conseyeros de Podemos son los únicos qu'arrenuncien al cobru de dietes. Esta formación amosó la so disconformidá na continuidá de Virgili, al considerar necesaria una renovación nel ente públicu de comunicación, y criticó'l pautu ente PP, PSOE y IX.

Quexes pol repartu de minutos na campaña

Podemos y Ciudadanos quexáronse pol repartu de minutos na campaña eleutoral nos informativos de RTPA. Dambes formaciones van contar con 25 segundos, polos 4 minutos y 30 segundos del PP, los 3 minutos y 10 segundos del PSOE, y el minutu y 5 segundos d'IX. Daniel Ripa, secretariu xeneral de Podemos Asturies, venceyó'l nomamientu de Virgili col pautu entes les trés formaciones "pa repartise la televisión pública", que tien el so primer actu na propuesta que fai la RTPA a la Xunta Eleutoral sobres los minutos que corresponderíen a cada partíu mientres la campaña, siempre ensin tener en cuenta "criterios informativos".