L’Asturies Revolution aporta a Uviéu

La xira conxunta de Dixebra y Fe de Ratas estrénase nel nuesu país tres iniciase’l mes pasáu en Lleón. Los dos grupos ufren más de trés hores de conciertu con actuaciones en solitariu y un ‘fin de fiesta’ con dambes formaciones nel escenariu.

Esta esperiencia qu’entamen les dos formaciones avilesines esponentes del rock comprometíu n’Asturies naz col enfotu de llevar la música de dambes bandes per ciudaes de fuera del país nos meses próximos. Asina, Dixebra y Fe de Ratas van tocar per separtao los sos cantares más conocíos, munchos d’ellos en versiones esclusives y con collaboraciones de miembros de la otra banda. Pa finar, tolos componentes van xubir al escenariu pa ufrir un final conxuntu al públicu.

El 17 d’ochobre la lleonesa sala Studio 54 acoyó l’estrenu de la xira, que tien la so segunda parada nel país, en concretu na uviedina Sir Lauren’s. Va ser mañana a les 20.30 hores, con entraes de 12 euros anticipada y de 15, na puerta. Los puntos de venta son los siguientes: Mimaria (Uviéu), Llibrería Paradiso (Xixón) y Discos Elepé (Avilés).

Tres el conciertu, la folixa va continuar en La Calleja, con descuentos en bébora presentando la entrada del Asturies Revolution. Los cacharros costarán un euru menos, mentes que cola cerveza será de 50 céntimos.