La XDLA demanda una Direición de Planificación Llingüística en RTPA

Propón reconvertir una de les trés direiciones del ente públicu de comunicación que lleven cuatro años ensin responsables.

La creación d'esta Direición de Planificación Llingüística ye, pa la Xunta pola Defensa de la Llingua Asturiana (XDLA), "imprescindible" pa garantizar la execución de les midíes sobre los medios de comunicación públicos incluyíes nel Plan de Dignificación de la Llingua Asturiana y nel alcuerdu d'Investidura ente la FSA-PSOE y IX. "Habría d'encargase d'impulsar l'usu de la llingua asturiana nes emisiones, mirando pola calidá tanto en términos normativizadores como normalizadores", espliquen dende la organización cívica, que la cree básica dende'l mesmu momentu nel que se "confirmó l'ausencia de persones comprometíes colos derechos llingüísiticos na direición xeneral y na mayor parte del Conseyu d'Alministración nuevu".

Esti movimientu dientro de la RTPA nun supondría renovación importante nenguna dientro del ente, yá que sirviría "cola tresformación d'una de les direiciones que lleven cuatro años ensin responsable, circunstancia que demuestra que nun son necesaries". Éstes son les d'Antena, Rellaciones Corporatives y Comunicación.

Avances n'Aragón y Illes Balears

La XDLA aprovecha esta reivindicación pa recordar los avances que tán viviendo les llingües propies nes autonómiques d'Aragón y Illes Balears. Nel primer territoriu, "el candidatu socialista foi escoyíu presidente col compromisu de medrar la presencia de les llingües propies na televisión y yá se tán dando pasos concretos nesi sentíu". Mentes, nes isles, tres el cambiu de Gobiernu, "la Direición Xeneral de Política Llingüística y la radiotelevisión autonómica, IB3, alcordaron un cambiu nel modelu llingüísticu de la canal, cuestión que se lleva faciendo dende setiembre d'esti añu".