Álvarez Peña va falar de la ‘Iconografía del arte popular asturianu’ na charra d’Ástura

Esti martes, a les 20 hores –media hora más tarde del horariu habitual–, va celebrase la charra mensual d’Ástura nel Atenéu Obreru de Xixón. Nesta ocasión el convidáu ye Alberto Álvarez Peña, que va falar de la ‘Iconografía del arte popular asturianu’.

L’etnógrafu, poro, va esplicanos cómo lo qu’entendemos como arte popular y que vemos n’horros, paneres, arcones, sobrepuertes de cases, cuernes de mecer, gaxapos o marcos de pan y quesu, ente otros, nun tien sólo un enfotu decorativu. “No fondero trescala’l raigañu proteutor de la collecha, el ganáu y la vida. Hexapételes, radiales, tetrasqueles o esvástiques nun son debuxos xeométricos ensin más; vencéyense al sol que frañe les tiniebles yá dende los tiempos de les vieyes relixones paganes”, espliquen dende l’Asociación Cultural Ástura sobre esti tipu de motivos, que se define n’ocasiones col nome xenéricu de ‘arte pastoril alpinu’. “Munches veces estes iconografíes fúndense nun sincretismu cola simboloxía cristiana de cruces, cálices o custodies, y abondos d'ellos podemos rastrexalos na dómina’l bronce y atopalos notres fasteres d’Europa coles que podemos tener un acervu cultural común”, añaden.

La charra, con entrada llibre, va celebrase a les 20 hores nel llocal del Atenéu Obreru de Xixón, asitiáu nel primer pisu del númberu 7 de la cai Cuadonga. El so protagonista, el xixonés Álvarez Peña, ye bien conocíu nel país pol so escomanáu trabayu dientro de la etnografía, sobre manera no que ye la mitoloxía y la tradición oral.