Foro y PP zarren l’alcuerdu eleutoral de cara al 20-A

El puestu númberu dos de la llista conxunta al Congresu va ser pal candidatu de Foro, Isidro Martínez Oblanca. Na llista al Senáu, la formación asturiana va ocupar el númberu trés.

Esta mañana confirmóse l’alcuerdu eleutoral ente populares y foristes pa dir xuntos a les eleiciones estatales del 20 d’avientu entamáu por iniciativa de Mercedes Fernández. La coalición va llevar el nome de Partido Popular-Foro, consiguiendo asina los primeros axuntar el votu de la derecha nel país y, los segundos, caltener el so escañu actual nel Congresu. Ésti, dao’l baxón eleutoral de Foro, peligraba, anque dientro de la organización yeren optimistes en mantenelu repitiendo’l númberu de votos algamáu nes municipales de mayu, esto ye, 65.000.

El pautu roblóse na Xunta Xeneral ente les presidentes de dambes formaciones, Fernández y Cristina Coto. Anueche, la líder de Foro comparecía énte los medios tres l’aprobación del alcuerdu por parte de la Comisión Direutiva del partíu pa dar a conocer los detalles del mesmu. Ésti da llibertá a los representantes de Foro a inscribise nel Grupu Mestu, nel que ta agora Enrique Álvarez Sostres, polo que la formación caltendrá la so autonomía.

Finalmente, los puestos de Foro na llista al Congresu son el 2 y el 6, y los suplentes 2 y 4. Mentes, nel Senáu cuenta col númberu 3 y el so correspondiente suplente.