Jesús Iglesias ve más lluces que solombres nel añu políticu

El coordinador xeneral d'IX n'Asturies, Jesús Iglesias, fexo ayeri balance del añu políticu n'Asturies, un exerciciu nel que ve "lluces y solombres" na política aunque con más "lluces".

Iglesias criticó la política del presidente asturianu Vicente Álvarez Areces en materia d'infraestructures centrándose na cuestión del trazáu ferroviariu d'alta velocidá L.lena-Xixón que "sigue ensin tener definición" y criticó tamién la postura que tien el PP respective a la reforma estatutaria, echándo-yos la culpa a los diputaos populares de "torgar a costafecha" l'aprobación d'un estatutu nuevu d'autonomía p'Asturies.

Na parte de les lluces, Iglesias declaró qu'Asturies vive momentos positivos y emponderó nesti sentíu la creación d'un plan d'emplegu xuvenil "qu'acabe cola lleenda urbana"; la meyora del mercáu inmobiliariu cola creación de planes de vivienda de protección oficial; y la creación d'un mercáu enerxéticu que "va garantizar el pesu económicu d'Asturies". Tamién rescampla ente lo positivo pa Iglesias la política mediuambiental, sorrayando'l papel del so partíu pa torgar la construcción del embalse de Caliao y p'aparar la creación de la incineradora de Cogersa.