L'etnográficu de Porrúa recibe fondos pa la so ampliación

El Conseyu de Gobiernu d'Asturies celebró ayeri la so última reunión del 2006, na qu'aprobó un paquete de subcvenciones por importe de 503.521 euros a estremaes entidaes culturales d'Asturies. Cerca de la metada de los fondos aprobaos, 243.000 euros, van dir pa la Fundación Muséu Etnográficu del Oriente d'Asturies, que va poder asina entamar les obres d'ampliación de les sos instalaciones en Porrúa.

Inauguráu en xunetu del 2000, l'Etnográficu de Porrúa organiza bien d'actividaes a lo llargo del añu como los tradicionales cursos sobre ellaboración de sidra, y participa tamién na Rede de Pueblos Culturales d'Europa, contando ente los sos fondos con una colecciónb única de grabaosde los sieglos XVIII y XIX con pieces de Cuevas y Pigal ente otros. Nel añu 2005, en que Porrúa recibió'l premiu Pueblu Exemplar d'Asturies, pasaron peles sos instalaciones 21.022 visitantes, un récord dafechu pa la institución qu'empobina l'Asociación Cultural "Llacín" de Porrúa y que xestiona una fundación independiente.