L’ecoloxismu asturianu da-y a Areces la “buyada purpurina”

La Coordinadora Ecoloxista d'Asturies fizo güei pública la entrega del premiu "Buyada Purpurina" que tolos años, dende va yá 14, "reconoz" con motivu del Día de los Inocentes, el llabor de les persones o entidaes que más fexeron pol estrozu mediuambiental n'Asturies. El Presidente asturianu Álvarez Areces ye'l "ganador" d'esti añu del premiu negativu pola so "nefasta xestión ambiental" y por "echar a andar proyectos de "grave impactu ambiental" colos que "amenaza" pa los próximos años.

La defensa d'Areces de la incineradora de Cogersa, que la Coordinadora diz que diba ser "la mayor d'España" ensin buscar otres alternatives meyores o la solicitú que fexo Arces de mayores derechos d'emisiones contaminantes pa les industries asturianes dientro del protocolu de Kyoto cuando la comunidá tien l'índiz más altu d'Europa d'emisiones por habitante son dos de los méritos d'Areces pa ser "buyada purpurina" del 2006. Otru tanto asicede cola so defensa de la regasificadora del Musel y de 12
Centrales térmiques de gas xunto con 3 llinies d'alta tensión. El proyectu d'embalse en Caliao (Casu) otru de los puntos más polémicos nel repasu al añu mediuambiental, apaez tamién na llista de méritos xunto cola "política de recalificación de suelu rural que facilita la destrucción de la costa" l'actitú permisiva con empreses contaminantes como Río Narcea, una política forestal "fecha d'espalda al campu" o'l gastu de fondos de compensación "n'infraestructures inútiles como l'autovía del occidente, que namás va valir pa qu'emigremos más rápido".