Vecinos y ecoloxistes denuncien la llegada a Tresona d’instalaciones industriales que pesllaron n’Euskadi por contaminantes

Un total de 280 vecinos de Tresona y el Colectivu Ecoloxista d'Aviles presentaron ayeri alegaciones énte'l conceyu de Corvera a la creación de trés fábriques nueves dientro de les instalaciones de la empresa de fertilizantes Fertiberia. Según los alegantes, estes llinies de producción, qu'emplegaríen materiales como l'amoniacu, ácidu nítricu o nitratu amónicu, van facese con equipos usaos que provienen de la factoría de Sefanitro en Lutxana (Euskadi) una fabrica qu'aseguren que tuvo que pesllar poles sos emisiones contaminantes.

Los vecinos qu'aleguen contra les nueves llinies de producción de Fertiberia en Corvera afirmen que suponen una "evidente modificación del procesu productivu" de la factoría que "ye de suponer que va llevar arreyada un incrementu nes emisiones y niveles de ruiu nel esterior respective a los actuales. Nes sos alegaciones, nes que piden que se-y niegue'l permisu a la fábrica pa estes nueves instalaciones, los vecinos recuerden que "la empresa tien les instalaciones en precario" y que los vecinos "nun aguantamos más esta contaminación".

La fábrica de Fertiberia en Tresona ye una de les más protestaes pola xente que vive na so contornada de toa Asturies. L'historial de quexes, denuncies y protestes pol ruiu y contaminación atmosférica y emisiones pelos desagües d'esta fábrica ye bien llargu, llevando nel so día a que'l mesmu Conceyu de Corvera la denunciare formalmente énte Mediu Ambiente.