La Raitana asoleya'l so segundu discu "Moh.ito"

La Banda de Gaites La Raitana, que dirixen los maestros Flavio R. Benito y Jordi F. Bolta, y qu'axunta a instrumentistes de los conceyos de Nava y de Piloña, acaba de sacar a la venta Moh.ito, el so segundu trabayu discográficu, compuestu por 11 temes ente los que s'atopen dende cantares tradicionales asturianos a nueves composiciones "de destacaos músicos del panorama folk d'anguaño" según sorraya la mesma banda.


Amás de les igües y composiciones feches polos mesmos directores de l'agrupación, Flavio R. Benito y Jordi F. Bolta, puen destacase nesti "Moh.ito" les aportaciones compositives de dellos músicos perconocíos como Ramón Prada, Javier Tejedor, Emilio Huerta, Jesús Arévalo, Kepa Junkera y el despaecíu Ígor Medio.

Editáu por Fonoastur, " Moh.ito" inclúi'l clip La Raitana. Apuntes d'una banda de gaites, realizáu por Ramón Lluis Bande, que ye un pequeñu documental sobre la preparación y los ensayos previos a la grabación del discu.

Esti discu asoléyase cuatro años más tarde que "De La Revuelta a La Marea" (Fonoastur 2002), el primer trabayu discográficu de La Raitana. Dende la banda coméntase que muestra "una progresión nel camín de la esperimentación con repertorios y xuegos armónicos y de percusión estremaos de los que davezu ufierten les bandes de gaites anguaño n'Asturies".