L'Efmo.com ganó y caltiénse terceru na clasificación

L'Efmo.com entamó la segunda vuelta de la lliga ganado al Alcobendas por 91 a 82, nun partíu, qu'anque igualáu, siempres tuvo controláu. Con esti trunfu l'equipu avilesín ye terceru na clasificación a una victoria de los dos primeros, el Badajoz y el Zamora. Agora la lliga para poles fiestes navidiegues hasta'l trece de xineru cuando tien de visitar al Canoe, cuartu clasificáu coles mesmes victories.

Ún de los sofitos de la victoria local tuvo nes perdes de balón y nos balones recuperaos, asina les avilesines perdieron 14 por 25 de les madrileñes y reuperaron 16 por 7 del equipu foriatu. Col equipu madrileñu venía Chinny Nwagbo, que l'añu pasáu xugó coles asturianes.
Los dos primeros cuartos foron igualaos y al descansu les locales ganaben por cinco puntos. Paula Fernández xugó de base, pues Berta Siñol entá ta mancada, y fizo mui bon trabayu. Tres el descansu les avilesines dominaron el tercer cuartu y fináronlu con una ventaya de catorce puntos, con un 71 a 57. Nel últimu cuartu foi cuando Chinny metió diez puntos y l'únicu cuartu ganáu poles madrileñes y ello valió-yos p'acurtiar la desventaya y dexar el marcador nesi 91 a 82 definitivu.


Nel equipu avilesín hai de destacar a Paula Fernández (18 puntos, 2 rebotes, 3 asistencies, 2 balones recuperaos, 5 balones perdíos, ficiéron-y 9 faltes personales y tuvo la meyor valoración del equipu local con 23 puntos), Jerica Watson (16 puntos, 9 rebotes, 6 balones recuperaos, 5 balones perdíos y ficiéron-y 4 faltes personales) y Devon Campbell (13 puntos, 4 rebotes, 3 asistencies y ficiéron-y 2 faltes personales). Nel equipu madrileñu la meyor foi Chinny Nwagbo (fizo dobles figures -19 puntos y 13 rebotes-, 1 balón recuperáu, ficiéron-y 6 faltes personales y tuvo la meyor valoración del partíu con 30 puntos).


Ficha:

Efmo.com: Paula Fernández (18), Orinta Kavaliauskaite (12), Devon Campbell (13), Dace Cinite (4) y Jerica Watson (16): Tamién xugaron:Mayte Riera, Esther Mesa (17), Isabel García y Debora Abreu (11).


Fundal Alcobendas: María Blanco (2), Esther García (13), África Pesquero (12), Kirenia Cabrera (14) y Chinny Nwagbo (19). Tamién xugaron: Paloma Martínez (2), Beatriz Gallardo (4), Berta Santolaya (4), Eva Smolka, Constantina Cabrera y Ana Aritzmendi.


Árbitrios: Juan Carlos Souto y Pablo Manuel Sanjurjo. Nel equipu local foron eliminaes por cinco personales Orinta Kavaliauskaite y Jerica Watson, nel equipu foriatu Kirenia Cabrera. Partíu de la decimocuarta xornada de la Lliga Femenina 2, xugáu nel Polideportivo de La Magdalena. Parciales per cuartos: 24-21, 23-21, 24-15 y 20-25.