L'arte asturianu tamién reivindica la oficialidá

El Conceyu Abiertu Pola Oficialidá(CAO) tien abierta estos díes una esposición artística na sala "Espaciu Astragal" del Conseyu de Mocedá de Xixón. Más de 70 artistes asturianos collaboren desinteresadamente con esta amuesa que tien por oxetivu consiguir fondos pa la plataforma reivindicativa a favor de la oficialidá del asturianu nel estatutu d'autonomía, pa lo que va facse esti sabadu 23 una puya de les obres espuestes. Asturies.com apurre a los sos llectores esta galería de semeyes con delles de les obres espuestes y a la venta dientro d'esta esposición qu'axunta arte y reivindicación.

Nun ye la primer vegada que'l mundu de les artes collabora con esta plataforma cívica, y asina l'añu pasáu el CAO organizare una primera amuesa d'obres d'arte que se fizo n'Avilés y que remató con una puya na que se vendieron les obres espuestes a beneficiu de los gastos del CAO por importe de dellos miles d'euros. Dempués d'esta primer puya que va tener llugar el sábadu a partir de les 19 hores, va celebrase una segunda puya'l miércoles 3 de xineru a la mesma hora.

La organización de la esposición y la puya faise gracies a la participación del Foru Arte Ciudá, que llogró que los más reconocíos artistes asturianos de l'actualidá donaren les sos obres pa la causa de los derechos civiles. Ente los nomes participantes rescamplen los de Fernando Alba, Maite Centol, Charo Cimas Paco Fresno Alejandro Mieres, Ricardo Mojardín, Hugo O'Donnell, César Ripoll, Pablo Armesto, Pura Fresno o Guillermo Simón, ente otros munchos. Pa mercar o, cenciellamente pa ver, la esposición va tar abierta nel Conseyu de la Mocedá de Xixón hasta'l 3 de xineru n'horariu de tardes.