El primer cuartu pesó como una llábana pal Farho Xixón Baloncestu

El Farho Xixón Baloncestu perdió'l partíu que xugó escontra'l Manresa en La Guía pol resultáu de 78 a 82. L'alcuentru tuvo marcáu pol mal entamu que tuvieron los xixoneses con un primer cuartu nel que perdieron por catorce puntos (11 a 25). Tamién foi perimportante l' actuación de los árbitrios, que perxudicaron al equipu local con dalgunes de les sos decisiones. Los xixoneses presentábense cola baxa de Iñaki Narros, cola lesión, nel entrenamientu del martes, de Chus Poves y con Isma Torres mui tocáu nuna rodiella nel partíu de Lleida. Con esta derrota, los asturianos son últimos na clasificación empataos a seis victories col Burgos y el Tenerife, que perdieron nesta xornada y que tán delantre pol "basket average". La prósima xornada, el cuatru de xineru, entama la segunda vuelta y los xixoneses van enfrentase en casa al Burgos, un alcuentru que va a ser perimportante pa la permanencia de los dos equipos.

L´equipu catalán, pela so parte, presentábase en Xixón con nuevu entrenador -al ser cesáu esta selmana Óscar Quintana y sustituyílu Jaume Ponsarau- y una riestra de xugadores perconocíos nel baloncestu español -Richard Scott, Espil, Josh Asselin y Rafa Martínez-.

El partíu entamó igualáu, pero los cinco minutos finales del cuartu foron mui malos pa los locales y ello llevó a que l'equipu foriatu se marchara nel marcador. Faltando trés minutos pal finar el periodu'l resultáu yera de 11 a 12, pero un parcial de 0 a 13, punxo'l marcador nun 11 a 25. Nel últimu minutu tocáron-y la tercera personal a Waleskowski y sentóse. Asselin metió siete puntos.


Les coses camudaron nel segundu cuartu, anque emprimó con una téunica a l'entrenador local, Joaquín Prado, y la másima ventaya catalana en tol partíu. Foi entós cuando'l Farho Xixón Baloncestu reaccionó y xugó con muncha rapidez ya intensidá. Los manresanos nun yeren a parar les rápides transiciones de los locales y asina metiéron-yos un parcial de 10 a 2, poniéndose con un 21 a 28. Nel últimu minutu la ventaya foriata yera de dos puntos, 34 a 36, anque'l cuartu finó con un 34 a 38 tres una canasta de Rafa Martínez. A lo cabero esti cuartu Joaquín Prado, énte lo curtio de la rotación poles mancadures, xugó con dos xugadores mozos de la cantera local, Dani González y David Piña. Nesti periodu Peter Rajniak metió dolce puntos.


Tres el descansu l'alcuentru tuvo igualáu, con ventayes manresanes que diben de los trés puntos a los nueve, con un 39 a 48 y 48 a 57. Lo curtio de la plantiya fizo que los asturianos xugaren colos dos bases -Dani López tuvo que xugar d'escolta, esto pasó en delles estayes del partíu-. Faltando menos de cuatro minutos pa finar el periodu volvió al campu Waleskowski que nun xugaba dende'l primer cuartu poles personales.


L'últimu periodu escomencipió con trés decisiones de los árbitrios que foron mui protestaes pol públicu -una personal n'ataque de Dani López, unes dobles de Callahan que nun pitaron y la cuarta personal d'Iturbe-.Les ventayes nel marcador del Manresa yeren d'ente cinco y un puntu -64 a 65 y 68 a 69-. A trés minutos y mediu pa finar el partíu, Waleskowski fizo la quinta personal y el resultáu yera de 68 a 69. Los xixoneses tuvieron posibilidaes de ponese delantre nel marcador, asina con un triple que Rubén Suárez falló. La mayor esperiencia y les rotaciones dierons el partíu al equipu catalán, pues xugaron meyor esos minutos finales y les ventayes d'éstos taben ente los trés y siete puntos. Nesti últimu cuartu Isma Torres metió catorce puntos.


Nel Farho Xixón Baloncestu los meyores foron Isma Torres (23 puntos, 3 rebotes, 1 asistencia y ficiéron-y 6 faltes personales y tuvo la meyor valoración del alcuentru con 26 puntos), Peter Rajniak (21 puntos, 6 rebotes, 1 asistencia, 1 balón recuperáu y ficiéron-y 3 faltes personales) y Mark Bigelow (11 puntos, 9 rebotes, 6 asistencies, 1 balón recuperáu, 1 balón perdíu, punxéron-y 1 tapón y ficiéron-y 5 faltes personales). Keith Waleskowski nun tuvo una bona actuación pues tres toca-y la tercera personal y tuvo munchos minutos ensin xugar. Nel equipu catalán los meyores foron Josh Asselin (19 puntos, 4 rebotes, 1 asistencia, 1 balón recuperáu, punxo 1 tapón y ficiéron-y 4 faltes personales), Rafa Martínez (17 puntos, 3 asistencies, 2 balones perdíos y ficiéron-y 6 faltes personales) y Richard Scott (12 puntos, 9 rebotes, 1 asistencia, 1 balón perdíu y ficiéron-y 4 faltes personales).
Na rueda de prensa tres el partíu Joaquín Prado tuvo unes pallabres mui dures pa l'actuación de los árbitrios, asina dixo que tuvieron "mui mal, horribles y Afonso escandalosamente mal y escandalosamente irrespetuosu. Tán nel partíu como si foren autistes. Nosotros somos los que nos jodemos. Cobren 360 euros caún por pitar. Esto ye una vergoña". Sobre l'árbitriu Afonso dixo que-y comentara que "si m'acerco voi a echate y repitiómelo seis vegaes" anque tamién reconoció que "la so influencia nel resultáu foi mínima".


Ficha téunica:

Farho Xixón Baloncestu: Dani López (7), Peter Rajniak (21), Mark Bigelow (11),Keith Waleskowski (8) ya Isma Torres (23). Tamién xugaron:Antxon Iturbe (2), Rubén Suárez (6), Txomin López, Dani González y David Piña.


Ricoh Manresa: Rafa Martínez (17), Miquel Feliu (5), Diego Sánchez (2), Richard Scott (12) y Josh Asselin (19). Tamién xugaron: Óscar González (5) Guillem Rubio (12), Juan Alberto Espil (6), Craig Callahan (4) y Rubén Burgos.


Árbitrios: F. J. Afonso y F. J. Velasco.Nel equipu xixonés foi elimináu por cinco faltes personales Keith Waleskowski (minutu 36), nel Manresa nun hebo eliminaos. Partíu de la decimosétima xornada de la Lliga Adecco LEB, xugáu nel Palacio de los Deportes de La Guía, cola asistencia d'unes mil quinientes persones. Parciales per cuartos: 11-25, 23-13, 16-19 y 28-25.