El Muséu de Belles Artes mercó un cuadru de tema asturianu de Perez Villaamil

El Muséu de Belles Artes de Asturias presentó ayeri una alquisición nueva a la so colección permanente. Trátase del cuadru de Jenaro Pérez Villaamil "Interior de la ilesia de San Xuan de Amandi de Villaviciosa" un cuadru del sieglu XIX que'l Muséu asturianu mercó por cien mil euros na galería del anticuariu bilbaín Michel Mejuto.

El cuadru, que mide 92x116 cm, perteneció a una colección privada y nunca se presentare en públicu. Como indica'l so títulu, reproduz l'interior de la ilesia románica d'Amandi, que se tien por una de les cabeceres del románicu rural asturianu. El so autor, Jenaro Pérez Villaamil (El Ferrol, 1807-Madrid, 1854) foi'l más importante de los pintores de paisaxe españoles del romanticismu. Na mesma sala en que va allugase esti cuadru van tar "La cueva de Cuadonga" tamién de Villaamil y una riestra de dellos retratos de los pintores Carlos Luis de la Ribera, Antonio Equivel, Antonio Gómez Cros, Ángel María Cortellini, amás de trés retratos de Federico de Madrazo. Un bodegón de Pascual Vilaró y obres de los pintores José Gutiérrez de la Vega, Germán Hernández Amores, Joaquín Díez, Cecilio Pizarro, Marcelino de Unceta, Dionisio Baixeras, Ignacio Díaz Olano, Miguel Jadraque, Antonio Pérez Rubio, Ignacio Pinazo y Raimundo de Madrazo completen la sala, que s'entitula "pintura española del sieglu XIX, del romanticismu al naturalismu".