La Coordinadora Ecoloxista va alegar contra la térmica de La Perea

La Coordinadora Ecoloxista d'Asturies foi la primer voz crítica en salir condenando l'alcuerdu ente les empreses HUNOSA y COGERSA pa construir la central térmica de La Perea (Mieres). La entidá conservacionista afirma que l'anuncia de construcción de la térmica "supón un pasu mas nel desastre ambiental de Mieres y d'Asturies" y asugura que, cola sida de renovar el parque termoeléctricu "lo que quieren poner ye 7 vegaes más de producción que la existente de 60 MW de carbón" .

La Coordinadora asegura qu'esta central diba quemar gas d'África que diba empeorar les condiciones atmosfériques del conceyu de Mieres, que diz que yá pasó nel añu pasáu 98 vegaes los topes de valores consentíos en Partícules en Suspensión y que se superaron los niveles de protección a la salú 250 díes del añu. La Coordinadora pide que se tenga en cuenta que, atiestando cola térmica de gas, va siguir la de carbón y escombru de La Perea y, a mui pocos kilómetros, les centrales, tamién ampliaes, de gas y carbón de Soto Rei. l'impactu al agua, col emplegu pola central de lo del Ríu Caudal a razón de 460 llitros per segundu, xunto cola construcción d'un gasoductu y una llinia eléctrica fechos a costafecha pa esta planta suponen los mayores daños ambientales d'una planta que va asitiase nuna zona de poblamientu mui espardíu que nun dexa pasiellos pa inxertar nellos les torretes precises son los otros argumentos de la Coordinadora pa refugar la térmica, polo qu'asegura que va presentar alegaciones al procedimientu alministrativu contra la central "porque nun ye de recibu que sigamos xenerando enerxía pa otros con recursos que vienen de lloñe y que son contaminantes, cuando otros consumen corriente xenerando empléu estable y de calidá ensin cargar colos impactos d'estos procesos térmicos".