Un falsu documental sobre la independencia de Flandes prende l’alarma en Bélxica

Nel añu 1938, l'actor y director Orson Welles aterrorizó a la población de los EEUU radiando la novela de H.G Wells "La guerra de los mundos". Muncha xente creyó aquella nueche que los marcianos invadíen la tierra y que la humanidá peligraba énte l'ataque de los extraterrestres. Cuasi 70 años dempués, los televidentes belgues quedaron ayeri presos d'una situación asemeyada cuando la canal valona de TV RTBF interrumpió la so programación con un parte especial dando anuncia de la declaración d'indepencia de Flandes.

L'alarma prendió a les 20:15 hores de la nueche, cuando nel marcu d'un programa que trataba sobre la unidá del país, la TV pública valona cortaba la emisión pa dar pasu a la noticia d'última hora: El parlamentu de Flandes acababa de votar pola so independencia de Bélxica, cumpliendo asina l'amenaza que dende va tiempu pesa sobre'l futuru de bélxica, onde conviven dos comunidaes que falen llingües distintes, la de la valonia francófona y la parte flamenca que fala un deriváu del holandés, amás d'una minoría alemana. L'anuncia, anque falsa, llegaba nun momentu en que l'independentismu flamencu, mayoritariamente d'ideoloxía derechista, consiguiere ún de los sos meyores resultaos electorales nes votaciones a conceyos del pasáu mes d'ochobre.

Pa da-y más pesu a la información, la canal de TV recoyía opiniones de periodistes qu'informaben en directo de les reacciones dende'l Parlamentu flamencu, dende'l parlamentu valón, el Palaciu Real, onde s'informaba de l'abandonu del mesmu pol Rei Alberto II o del Atomium, onde supuestamente taben guardaos los ministros del Gobiernu de Bruseles. Otres conexones llevaben a periodistes asitiaos nel Parlamentu Européu, onde un supuestu grupu d'independentistes catalanes festeyaben la noticia. Les entrevistes a políticos y famosos que se prestaron a la sonsaña completaben l'espaciu xunto con reportaxes qu'enseñaben les consecuencies de la decisión: la circunvalación de Bruseles paralizada, trenes paraos na frontera, aviones disviaos o la sede de la OTAN n'alerta, too ello dientro d'un programa que se preparó con precuru a lo llargo de selmanes.

Les reacciones a la emisión del falsu reportaxe alcuéntrense na mesma web de la RTBF y nos medios belgues como'l periódicu Le Soir