La idea d’una asociación de músicos asturianos presidió’l seminariu añal de la Fundación Belenos

El Conceyu d'Estudios Etnográficos "belenos" celebró estos díes 11 y 12 de payares na Puela d'Allande'l so ñeminariu añal, qu'algamó la so séptima edición centrándose esti añu'l debate na música tradicional asturiana y la so evolución nos caberos años. Más de cincuenta músicos, investigadores y especialistes trabayaron a lo llargo del fin de selmana nun debate granible y interesante.

El primeru de los ponentes en participar nos debates foi'l músicu y investigador Xosé Ambas, que fexo un repasu de les fontes existentes pal estudiu de la musica tradicional asturiana. Toa triba de fontes orales, documentacion escrito y grabaciones actuales y históriques como les d'Alan Lomax apaecieron na conferencia d'Ambás, que tamién fizo una valoracion y categorización de les mesmes, lamando a quitar dellos prexuicios sobre fontes que, al so paecer, tán poco valoraes, casu de los archivos de la sección femenina, y a valorar na so xusta midida otres fontes de les que se taría abusando.

Pela so parte, Ignaciu Llope, cola conferencia "Los signos del aire: una xenealoxía del folk asturianu" fizo una categorización de los estremaos tipos de música que se trataben nel seminariu, estremando ente música popular, tradicional y folk, categoría na que centró la so esposición y que definió como "un discursu consciente de reellaboracion de la música tradicional, un discursu que "se desarrollo dende los años 70 a traves del celtismu, de manera asemeyada a lo qu'asocedió n'otros llugares".

Partiendo de les entrugues que-y facíen munches vegaes los periodistes y recreándose nes que-y gustaria que-y ficieren, el músicu José Angel Hevia contó la so evolución de gaiteru local a estrella de la musica folk, una condición que llevó a que nel debate posterior a la so charra apaeciere'l tema de la rellacion ente la Sociedá Xeneral d'Autores y Editores (SGAE) na qu'Hevia ocupa un papel relevante, y la música asturiana. Hevia atendió a toles cuestiones que se plantegaron esplicando que, dende'l so puntu de vista yera importante que "los musicos asturianos conozan como funciona la SGAE" y que tamién-y abultaba preciso que s'axuntaren pa esixi-y a la SGAE contraprestaciones, como'l que los ingresos de la música asturiana revirtieren realmente nella. D'otra manera, Hevia pidió tamién un cambéu na política de subvenciones, solicitando que, "en cuenta de marchar les perres na edicion de discos esclusivamente, s'empobinaren más recursos a la promocion". Foi nsti debate cuando surdió la idea de los beneficios que podría aportar una asociación de musicos asturianos como preséu de presión énte alministraciones y entidaes. Esta iniciativa, que nun llegó a cuayar, presidió'l seminariu, apaeciendo más vegaes nel debate.

El seminariu siguió cola llectura por Xosé Nel Riesgo de la ponencia sobre'l rock n'asturianu escrita Xune Elipe, que nun pudo asistir, y na que se fizo un retratu de la evolución del xéneru dende los sos primeros pasos con grupos como "asturcón" hasta l'actualidá en términos optimistes y positivos.

Como resume a toa una intensa xornada, y tres una nueche na que, cola collaboración del "café El centro" se presentó'l discu homenaxe a la bandina "Aires del Palo", el debate del domingu volvió sobre temes yá tocaos, como'l de la SGAE, pero tamién apuntó curestiones nueves. El grau de profesionalización de los músicos folk asturianos, la necesidá de superar modelos como'l de les nueches folk, l'estatus llegal de los arreglos sobre temes tradicionales o la falta d'una politica musical valiente dende'l Gobiernu asturianu foron dellos de los temes que se tocaron, presidiendo nuevamente l'ambiente la idea compartida de la necesidá d'una xuntanza de músicos asturianos.