Esti 1 de setiembre vence'l plazu pa l'aplicación de la llei del tabacu

Esti 1 de setiembre vence la moratoria apautada na Llei del Tabacu pa que los propietarios de locales de más de 100 metros cuadraos adaptaren los sos negocios al mandáu llegal qu'apauta qu'estos locales tienen qu'estremar una zona acutada pa fumadores y otra pa non fumadores.

La FADE perita que más de 6.000 locales d'hostelería van declarase dende mañana "espacios llibres de fumu" dempués de que en toos estos meses nin gobiernu nin empresarios llegaren a un alcuerdu sobre l'aplicación de la llei énte la dificultá que lleva arreyada l'adaptación de los locales. La FADE llegó a pidir que se prohibiere'l tabacu dafechu en tola hostelería asturiana, dalgo que'l Gobiernu asturianu refugó afirmando que nun tenía competencies pa ello.

La portavoz del Gobiernu Ana Rosa Migoya declaró que'l Gobiernu asturianu unviare a tolos hosteleros asturianos un documentu aclariando l'aplicación de la llei, los tipos de barrera posibles pa estremar les zones y el tratamientu del tabacu en bodes y otres celebraciones. Ana Rosa Migoya esplicó que'l Gobiernu asturianu va aprobar tamién nes sos cuentes pal 2007 unes subvenciones retroactives pa les obres d'adaptación a la llei.

La Unión de Consumidores d'Asturies denunció lo que-y abulta "demagoxa y racanería" por parte de los hosteleros, que diz que tuvieron tiempu pa cumplir la llei.