Andecha Astur denuncia les polítiques de vivienda d'Izquierda Xunida

El partíu políticu Andecha Astur (AA) emitió un comunicáu en que califica de "engañu" les polítiques de vivienda d'Izquierda Xunida. AA critica qu'IX se congracie pola creación de 18000 viviendes cuando en realidá, acordies colos datos que tien esti partíu, namás tan faciéndose 2.000.


Pa la formación nacionalista, IX nun ta ayudando a camudar el sistema económicu que ta xubiendo los precios de la vivienda, un sistema que fai de la vivienda el motor del actual modelu económicu d'Asturies y nel que dos terceres partes de la riqueza de les families tien rellación cola vivienda, un negociu del qu'AA diz que se beneficien sobre too bancos y caxes al acaparar el beneficiu de los créitos hipotecarios, ello mientres que los conceyos tienen nel urbanismu'l so principal aporte d'ingresos y cuando amás el mercáu llaboral depende del emplegu nel sector de la construcción.


Énte esta situación, Andecha Astur reclama una política seria sobre'l coste del suelu, que ye'l que más repercute nel preciu final de la vivienda y midíes desgravatories pa los alquileres, al empar que critica por ser probetayes y suponer un marafundiu les actuales polítiques de subvención a los promotores de suelu protexíu. AA llamenta tamién qu'Izquierda Xunida renunciare a la creación de cooperatives de viviendes qu'ellos mesmos promovieren, casu de Roces-Granda y la mala aplicación del dineru
de los fondos mineros que se manda pa subvencionar l'accesu de la mocedá a la vivienda nes Cuenques.