Sánchez Vicente asitia en dos escaños l'oxetivu d'Unión Asturianista

El dirixente del Partíu Asturianista Xuan Xosé Sánchez Vicente declara nuna entrevista qu'asoleya'l diariu "La Voz de Asturias" que la so formación, coaligada cola Unión Renovadora Asturiana na xuntura "Unión Asturianista" márcase l'oxetivu de llegar a los dos diputaos nes elecciones del 2007. Sánchez Vicente diz na entrevista que va calificase de "fracasu" cualquier resultáu que baxe d'esa espectativa de votu pa mayu del 2007, y nun aclaria si va presentase como cabeza de llista de la coalición al conceyu de Xixón, anque reconoz que ta estudiándolo. En casu de fracasu electoral, Sánchez Vicente nun cree que por ello vaya francer la coalición, que calificó de "intentu de dar salida al asturianismu históricu y normalizar la sociedá asturiana".