Valledor califica de "propaganda llamentable" el llibru anónimu qu'anuncia los llogros del Gobiernu asturianu

El Conseyeru de Xusticia Francisco Javier García Valledor, amestóse a les crítiques al llibru anónimu que fai propaganda del llabor del Gobiernu asturianu y que circula estos díes per Asturies. El Conseyeru d'Izquierda Xunida aseguró que nin elli nin naide de la so formación teníen conocimientu de que fuera facese'l llibru y llamentó la "obsesión" de los sos socios de gobiernu de la FSA por facer propaganda de los sos llogros, convidándolos a desmarcase públicamente del llibru. Pa Valledor, les seyes ediciones del llibru "Construyendo Asturies, una visión rexonal del sieglu XX" suponen una frasca de propaganda "llamentable" contra la que diz que yá s'enfrentare la so formación cuando s'editó un cartafueyu, esti con firma institucional, nel que s'anunciaben los llogros del primer añu de llexislatura. Énte la negativa de la parte socialista del Gobiernu a reconocer l'autoría del llibru, Valledor ironizó afirmando que "una imprenta de Leganés pocu o nengún interés va tener n'esparder les acciones del Gobiernu d'Asturies".

Mientres el Conseyeru de Xusticia atalanta que la publicación pue suponer una violación de la Llei de Publicidá Institucional, dende'l Bloque por Asturies, formación que participa tamién nel gobiernu asturianu en coalición con IX y la FSA, adelantóse que van pidise esplicaciones en sabiéndose quien son los autores que tán tres de la publicación.