Areces diz que’l PSOE nun va aceptar la oficialidá en casu de ganar nel 2007

El Presidente asturianu y candidatu de la FSA-PSOE a les elecciones del 2007 Vicente Alvarez Areces declaró ayeri nel marcu de la Feria de Muestres de Xixón que l'asitiamientu del so partíu no tocante al asturianu en pasando les elecciones del 2007 nun va cambiar nin lo más mínimo y que la oficialidá sigue fuera de los sos oxetivos, nuna alvertencia a los sos socios de gobiernu d'IX-BA.

El Presidente asturianu dixo tamién que nun taba d'alcuerdu cola idega qu'esparde Ixde que'l Gobiernu fai poco pol asturianu. Areces dixo qu'eses afirmaciones "nun se correspuenden cola realidá" y declaró que foi "elñ PSOE, tanto agora como n'otres ocasiones que tuvo al frente del Gobiernu asturianu" el "principal impulsor del usu, la difusión y el fomentu del asturianu". Areces recordó que foi tando elli de director provincial d'educación cuando entamó adase asturianu nes escueles y dixo que tolo qu'esiste güei en materia de promoción del asturianu ye "porque se fexo d'aquella" asegurando que los socialistes "tenémonos polos auténticos impulsores d'esta política dende va décades y contribuyimos a que nun se pierda una parte importante de la nuestra cultura"

Areces repitió que nun ta d'alcuerdu con que la promoción del asturianu lleve a la oficialidá d'esta llingua nel estatutu d'autonomía, y aclarió que'l 12 de setiembre va comparecer énte'l Parlamentu asturianu pa dar una primer esposición sobre'l procesu de reforma del estatutu d'autonomía.