IAS convida al Bloque por Asturies a dexar IX por ser "parte del problema"

El partíu políticu Izquierda Asturiana (IAS) emitió ayeri un comunicáu de prensa nel que'portavoz de la formación Ignaciu Llope declara que-y abulta "poco creíble" el movimientu del Bloque por Asturies que proclamó candidatu a la presidencia d'Asturies a Rafael Palacios y dio anuncia de que diba presentase a les elecciones del 2007 por cuenta propia dempués de presentase en coalición con IX nel 2003.

Pa Llope "les coses pinten mal pa qu'IX vuelva a pidir el votu asturianista nel 2007 dempués de la montonera de promeses incumplíes y la socesión de xestos pa la galería que foi esta llexislatura pal votante asturianista". Dientro d'esta dinámica, el portavoz d'IAS afirma que'l Bloque xugó'l papel de "coartada asturianista" como apéndiz d'IX na so política de pautu col PSOE, un pautu que llevó a Asturies a una situación económica, cultural y mediuambiental que precisa d'una rempuesta".

El portavoz d'IAS camienta que l'acción del Bloque presentando candidatura propia namás tien por oxetivu "apertar pa consiguir meyores puestos nes llistes d'IX" y entrúga-y a Palacios "si quier siguir siendo parte del problema o pasar a ser parte de la solución" en referencia al procesu de conversaciones que ta llevando alantre IAS col oxetivu d'iguar una alternativa electoral "asturianista d'izquierdes y ecoloxista pal 2007". Al rau d'ello IAS píde-y a Palacios y al Bloque "que se definan énte la posibilidá de que se forme pal 2007 una alianza electoral que pue ser una alternativa real d'izquierdes, ecoloxista y asturianista a les politiques d'IX y PSOE". Dende IAS afírmase que, anque nun hebo pel momentu contactos col Bloque, esta organización pue "desmarcase d'IX y trabayar por construyir una alternativa real y non dependiente de factores esternos".