El Bloque por Asturies presentó a Rafael Palacios como candidatu pal 2007

La organización Bloque por Asturies, qu'anguaño participa nel Gobiernu asturianu en coalición con Izquierda Xunida y la FSA-PSOE dio esta mañana una rueda de prensa na que dio anuncia de que la Xunta Nacional del BA, con fecha del 31de xunetu, decidió por unanimidá proclamar candidatu a la presidencia d'Asturies nel 2007 a Rafael Abelardo Palacios, actual director de Cooperación del Gobiernu asturianu y ún de los dirixentes históricos de la organización.

Según el Bloque por Asturies, dempués de laesperiencia de gobiernu conxunta d'esta llexislatura, agora dase "la meyor coyuntura politica pa la presencia del asturianismu d'izquierdes y l'asturianismu cultural na escena política asturiana". RafaelPalacios argumentó que "esta esperencia de gobiernu demostro que tenemos capacida pa facer politica y que somos una opcion válida más allá del mundu del PP y PSOE". Por ello, amás de la presentación de Palacios como candidatu, el Bloque va entamar, a partir del 8 de setiembre,la presentación de los sos candidatos a alcaldíes nos conceyos onde esta fuerza tien presencia.

En cualquier casu, el líder y candidatu del BA aclarió que la so presentación como aspirante a la presidencia d'Asturies nun quier dicir que franza l'actual executivu. Palacios afitó que "tenemos volunta de cumplir hasta mayu del 2007 los alcuerdos firmaos" y que "Nun hai motivu pa romper, nun siendo que los incumplimientos del alcuerdu sian intolerables".

La presentación de Rafael Palacios como candidatu tampoco quier dicir que'l BA vaya presentase en solitario a les elecciones del 2007, nin tampoco que nun puea renovase l'alcuerdu con IX del añu 2003. Ello que'l Bloque ta abiertu a la negociación "con toles fuerces polítiques asturianistes y d'izquierda", anque dexóse bien claro que "pel momentu nun hai negociaciones con naide" un naide qu'incluye tamién a la mesma IX, que presentó apocayá a Jesús Iglesias como'l so candidatu pal 2007 pero que nun entamó conversación nenguna col BA con vistes a repetir alcuerdu nel 2007.