L'alcalde de Villaviciosa anecia en caltener los nomes de cais franquistes nel conceyu

L'alcalde de Villaviciosa Asensio Martínez Cobián, acusó al Gobiernu socialista de José Luis Rodríguez Zapatero de "desenterrar l'hachu de guerra" cola Llei de Memoria Histórica, una acusación que-y echó tamién al secretariu de la FSA Javier Fernández, por pidir que se retiraren los nomes de les cais de Villaviciosa y Uviéu que
caltienen nomes franquistes en cumplimientu d'esta llei que pretende dignificar a les víctimes de la dictadura y que nun ta prestando nin en sectores de dereches a los que-yos abulta revanchista nin en munchos d'izquierdes que la ven probetaya.

Ello ye que la mesma casa conceyu de Villaviciosa asítiase na "Plaza del Generalísimo" anque ye más conocida pola "plaza'l güevu", y la casa conceyu caltién na so fachada dellos emblemes y plaques de tiempu de la dictadura que l'alcalde de maliayo yá se negó a retirar delles vegaes en plenu del conceyu. Pa Cobián les cais con nomes de la dictadura son parte de la historia y diz qu'hai tamién estatues y nomes de víes públiques "del otru bandu" que ye preciso respetar.