CCOO denuncia la presión urbanística sobre la costa

Comisiones Obreres d'Asturies emitió una nota na que llama l'atención sobre la xuba de la presión urbanística na costa asturiana. El sindicatu afirma que, anque ye una de les meyor conservaes de tola península, la costa asturiana enfréntase a una gran cantidá de propuestes d'urbanización ente les que rescampla'l casu de Llanes, onde se fixeron 15.000 viviendes en pocos años, un númberu de vivienda nuevo asemeyáu al d'habitantes del conceyu.

Jeremías Dos Santos Zapico, secretariu de Salú Llaboral y Mediu Ambiente de CC.OO. d'Asturies, analizó estes realidaes y apuntó que la causa principal, ente otres, de que se lleven alantre tantes construcciones na costa, ta na falta de recursos de los mesmos conceyos, que los fai echase al pie d'estos planes urbanísticos "pensando nos ingresos que puen obtener pela vía de los convenios urbanísticos y les llicencies ensin pensar nos gastos que lleven arryaoa les infraestructures y los servicios que tienen de tener obligatoriamente estes urbanizaciones nin na perda de valores paisaxísticos y mediuambientales.

El representante sindical pon el casu del sur español, onde s'aplicó masivamente esti modelu llevando a una perda de la calidá mediuambiental "hasta'l puntu de que delles asociaciones d'hosteleros ven peligrar la marcha del sector y tán plantegándose un cambéu de modelu''. Pa Dos Santos, ye evidente que'l turismu asturianu desarrollóse sobre la base de la calidá ambiental, polo que nun pue ponese en peligru'l futuru del sector y polo que-y esixe al Gobiernu asturianu que nun ceda na defensa de la calidá de la costa, obligando a los conceyos a cumplir cola llei.