Asturies ye una de les comunidaes con meyor rindimientu escolar según la Conseyería d’Educación

Nuna rueda de prensa celebrada ayer, el conseyeru d’Educación, José Luis Iglesias Riopedre, presentó dellos datos sobre’l rindimientu escolar correspondientes al cursu 2004-05, qu’asitien a Asturies, xunto col País Vascu y Navarra, ente les que presenta meyores resultaos según el conseyeru, teniendo por exemplu la tasa más alta del Estáu de titulaos de la ESO. Riopedre destacó que la educación asturiana "goza de bona salú" y conseñó que l’éxitu allugase nel eleváu gastu per alumnu, 5.050 euros frente a los 2.500 de la media estatal, asina como nel "sofitu" que tienen "los mozos y moces con problemes".

Según los resultaos asoleyaos pola Conseyería d0Educación, el promediu d’alumnos que supera la educación Primaria ye del 95,4 % y la tasa d’idoneidá a los 12 años (proporción d’alumnos que progresen adecuadamente durante la etapa) ye del 87,3 %, dos puntos perriba de la media estatal. La tasa de titulación na Enseñanza Secundaria Obligatoria (ESO) ye del 84,5 %. mientres que la tasa bruta de graduaos (proporción ente l’alumnáu que termina los estudios, independientemente de la edá, cola población total de 16 años) allegase n’Asturies al 87,9 %, 18 puntos perriba de la media estatal y casi 3 de la Xunión Europea.

En cuantes al Bachilleratu, la tasa de titulación tuvo una subida de 10 puntos nos últimos 6 años, y pasó del 65,7 al 75,7 % frente al 60 % del Estáu. No que cinca a la Clasificación Internacional Normalizada d’Estudios (CINE), el nivel 3, qu’engloba los titulaos en Bachilleratu y nel Grau Mediu de Formación Profesional, Asturies tien una tasa de titulación del 72,6 %, más de 11 puntos perriba de la estatal, anque 4 perbaxo de la Xunión Europea.

L’abandonu educativu tempranu, que correspuende al porcentaxe de población de 18 a 24 que completó como máximo la primer etapa de la Educación Secundaria (CINE-2) y nun sigue nengún estudiu o formación, ye del 18,3 %, 12 puntos meyor que nel conxuntu del Estáu. La tasa de titulación nos ciclos formativos de Grau Superior de ta alrodio del 90 %. Finalmente'l conseyeru destacó que’l rindimientu escolar ye meyor nes muyeres, que superen a los homes ente 4 y 6 puntos.