Asturies va sentase na Mesa del Comité de les Rexones

Esti próximu vienres 7 de xunetu una representación del gobiernu asturianu encabezada pol Director Xeneral de Rellaciones Esteriores y Asuntos Europeos, Dario Díaz, va participar nun conceyu estraordinariu de la Mesa del Comité de les Rexones que va celebrase na localidá finlandesa de Turku.

Ente los asuntos más destacaos del orde del día figura l’exame pa decisión del documentu qu’ellaboró’l Comité sobre l’aplicación y el control de los principios de subsidiariedá y proporcionalidá y el papel políticu y operativu d’este organismu.
Tamién va desarrollase la mesa redonda: "Globalización, descentralización y competitividá: collaboración ente los sectores públicu y priváu" na que los asistentes discutirán sobre la ellaboración de les estratexes europees, estatales y rexonales no que cinca a la globalización y la competitividá. Asimesmo, los miembros de la Mesa reflexonarán sobre les rellaciones del Comité de Rexones con otres asociaciones europees y estatales, como ye’l casu del Congresu de Poderes Rexonales y Locales.

El Comité de les Rexones foi creáu pol Tratáu de Maastricht en 1994 como órganu consultivu del Conseyu de Ministros y de la Comisión. Anguaño, el Comité tá compuestu por 317 representantes d’entes locales y rexonales y les sos aries de consulta son política rexonal, redes transeuropees, cultura, formación profesional, educación, salú pública, empleu, asuntos sociales, mediu ambiente y tresporte.