Quique Faes ganó'l "IX Concursu de Cuentos pola Oficialidá del Asturianu"

El pasáu 30 de xunu tuvo llugar na Casa la Cultura de Bimenes la entrega de premios del "IX Concursu de Cuentos pola Oficialidá del Asturianu". Al actu asistieren l'Alcalde Bimenes, José Emilio González Aller, el Teniente d'Alcalde de Miranda del Douro, Antonio Carçao, y el Xefe de la Oficina de Política Llingüística, Ramón d'Andrés Díaz. El primer premiu, dotáu con 800 euros, foi pal escritor y periodista Enrique Faes Díaz (Xixón 1975) pola so obra "¿Por qué tuvisti que tirar el pianu cuandu yo pasaba perbaxo?". Pablo Rodríguez Medina algamó'l segundu premiu, de 500 euros, col cuentu "Segundes oportunidaes", y el tercer premiu, dotáu con 350, foi pal relatu "Tocaba nun grupu de rock alternativu", de Pablo Suárez Fernández. El xuráu del concursu, al que se presentaren 22 cuentos, tuvo formáu nesta ocasión por Xulio Vixil Castañón, Xosé Ramón Martín Ardines y Naciu Varillas Alonso.