Antonia Fernández Felgueroso, escoyida Procuradora Xeneral

El plenu de la Xunta Xeneral celebráu ayer decidió que sía la ex-conceyal socialista de Xixón Antonia Fernández Felgueroso la qu'ocupe'l cargu de Procuradora Xeneral. Como axuntu al cargu va tar Noel Zapico, ex-dirixente del Partíu Popular. La elección de Felgueroso contó'l col sofitu del PSOE y del PP, mientres qu'IX decidió votar en blancu.

La elección pal cargu requería l'apoyu de les tres quintes partes de los 45 diputaos que formen la Xunta Xeneral, lo que llevó a socialistes y populares a algamar hai unes selmanes un alcuerdu non esplícitu pal nomamientu de Felgueroso. Esta decisión del PSOE resultó polémica por cuantes el so sociu de Gobiernu, Izquierda Xunida, al través del so secretariu xeneral Jesús Iglesias declaró que'l nomamientu negociáu col PP de la hermana de l'alcaldesa de Xixón abría "un mecanismu perversu na Xunta Xeneral" albidrando a resultes d'ello un últimu añu de llexislatura "con tensiones mui difíciles". Asimesmo la portavoz d'IX na Xunta Xeneral, Noemí Martín, daba anuncia'l pasáu 13 de xunu que rompía la unidá de votu colos socialistes.

La yá Procuradora Xeneral, María Antonia Fernández Felgueroso, foi "directora rexonal" d'Acción Social ente 1984 y 1991. Nesi añu y hasta 1993 foi conseyera d'Educación, Cultura, Deportes y Mocedá. Darréu d'ello foi responsable del departamentu d'Interior y Alministraciones Públiques y ente 1995 y 1999 trabayó como docente na Escuela Universitaria de Trabayu Social d'Uviéu. Finalmente en 1999 foi escoyía conceyal del PSOE en Xixón, cargu que mantuvo hasta hai pocos dies cuando dimitió pa poder acceder al cargu de Procurador Xeneral.

La figura de Procurador Xeneral ye l'equivalente asturianu al de "Defensor del Pueblo" español, l'"Ararteko" vascu, el "Síndic de Greuges" catalán o'l defensor del Pueblu de la Xunión Europea, l'"ombudsman".