La Casa Posafuelles celebra'l so primer añu

El chigre "la casa posafuelles" que tien la organización Xunta pola Defensa de la Llingua Asturiana va celebrar esti xueves 29 la so fiesta de primer aniversariu con un actu que va entamar a les diez de la nueche con una llectura de poemes a cargu de los poetes Lourdes Álvarez y Pablo Texón. Darréu d'ello va haber tonada y gaita con Queipo y Llorián y l'actuación del bandurrieru Héctor Braga.

Va un añu yá que la Xunta inaguró La Casa Posafuelles, local onde se desarrollen toles selmanes actividaes p'amosar lo que se ta faciendo anguañu na nuestra llingua: na música, lliteratura o etnografía. Nesti primer añu, ente charres y presentaciones de llibros pasaron pel chigre Alberto Álvarez Peña, Héctor Blanco, Inaciu Llope, Lluís Portal, Pablo Suárez, Pilar Fernández, Xosé Nel Riesgo, Xulio Vixil y Xulio Elipe "Xune" y actuaron DRD, Dulcamara, K-Nalón, La Bandina, Los Ciquitrinos o Tuenda ente otros.

El nome de"la casa posafuelles" vien de la esistencia en biende llugares d'Asturies d'una casa onde la xente apara de tarde al volver de trabayar, o a cualquier hora si-yos queda de pasu. Una casa d'un vecín cualquiera onde siempre hai xente na cocina y onde cualquiera puede entrar a dar parola. Una casa alcontradiza onde siempre se pon un cafetín o un vasu, onde se cunten histories y onde -si cuadra- s'echa una cantarada y lo que siga. Na Cai Cuesta la Vega d'Uviéu, la Xunta tien la so casa posafuelles.