Morrió Mundo Collada

"Mundo Collada, que fuere conceyal asturianista por Villaviciosa ente 1995 y el 2003, morrió na madrugada del llunes 7 al martes 8 de xineru por causa d'una complicación nuna operación quirúrxica, según pudo saber Asturies.com. El cuerpu del veteranu asturianista alcuéntrase nel tanatoriu de Villaviciosa.

Mundo Collada saliera escoyíu conceyal por Villaviciosa nel 1995, añu en qu'encabezó la llista del Partíu Asturianista, convirtiéndose nún de los primeros conceyales asturianistes de la historia. Vueltu a escoyer nel 1999, Mundo, en desalcuerdu cola llinia política del PAS, abandonó la disciplina d'esta formación, pasando los sos últimos años de conceyal como asturianista independiente. Nel 2003, Mundo Collada anunció la so retirada de la política. Ente los motivos que más pesaron pa esta decisión tuvo'l cansanciu y la poca repercusión de les sos propuestes nun ayuntamientu gobernáu daquella pola mayoría absoluta del PP d'Asensio Cobián. Dende entós, anque nunca abandonó la escena de la reivindicación asturianista, participando en manifestaciones y actos a favor de la oficialidá del asturianu, centróse na so familia y nel so trabayu como responsable de calidá nel llagar de Sidra el Gaitero."