7.350 euros pol arte y pol asturianu

L'arte pol asturianu viende. Asina se demostró esti sábadu en Palaciu de Valdecarzana, onde la primer amuesa d'artistes pola oficialidá remató con una puya pública na que s'ufiertaba un catálogu de 60 obres de más de 50 artistes, presentaes por Ánxel Nava y Toño Caamaño. El públicu asistente puyó poles obres, recaudándose en total cerca de 7.350 euros que van dir íntegramente pa cubrir los gastos del Conceyu Abiertu Pola Oficialidá, entidá responsable de la esposición y de la "caravana pola oficialidá" qu'esa mesma mañana anduviere tola contornada del conceyu d'Avilés reclamando la oficialidá del asturianu nel Estatutu d'Autonomía.

La escultura "Solar" de Pablo Maojo, que yera la pieza col preciu de salida más caru del catálogu (1.200 euros) foi tamién la que llogró'l mayor preciu de la tarde, vendiéndose en 1.400 euros, mientres que "Texu", de Carlos Sierra, quedó nos 850 euros que yeren el so preciu de salida. Otru de los precios caros que se pagaron nuna puya que permitía tamién facese con obres d'arte a precios bien axustaos foi una serigrafía de Fernando Alba qu'algamó los 530 euros. Victor Picallo, conocíu miembru del grupu parlamentariu d'Izquierda Xunida, foi xunto colos representantes de la Tertulia Cultural El Garrapiellu, ún de los puyadores más activos na subasta , a la qu'asistieron tanto simpatizantes del Conceyu Abiertu Pola Oficialidá con interés por facese con dalguna de les obres a la venta como particulares ayenos a les reivindicaciones del CAO pero espertos n'arte qu'acuden davezu a les puyes que se celebren nel país.

Curiosamente, una de les obres del principal promotor de la iniciativa, l'artista Ánxel Nava, foi la que llogró la mayor revalorización. L'arfueyu col que ficiere Nava una de les sos acciones artístiques y que salía col preciu de 3 euros, yera la pieza que pesllaba la puya, vendiéndose a la fin en 123 dempués d'una puya bien llarga na que cuasimente los cerca de 100 asistentes, sacantes los que yá escosaren los sos capitales en mercar les demás obres a la venta, llevantaron el brazu pa facer una ufierta pol oxetu. El CAO plantégase agora repetir la esperiencia coles obres non vendíes nesta esposición y con otres nueves cedíes por artistes que declararon la so intención de collaborar desinteresadamente cola esperiencia pero que por razones d'espaciu quedaron fuera nesta convocatoria.