El Conceyu Abiertu pola Oficialidá entama una intensa xornada n'Avilés

El Conceyu Abiertu pola Oficialidá organiza mañana sábadu n'Avilés una riestra d'actividaes reivindicatives col oxetivu de concienciar a la población de la contornada avilesina sobre la reivindicación de la oficialidá del asturianu na reforma del estatutu.

La xornada va entamar con una edición más de la yá popular "Caravana pola Oficialidá" que va salir a les 11 de la mañana de Cancienes, n'Avilés, y que va pasar tamién pelos conceyos de Corvera y Castrillón reclamando la oficialidá de la llingua na próxima reforma estatutaria.

N'acabando la Caravana, a les 7 de la tarde va celebrase en Palaciu de Valdecarzana la puya pública de les obres d'arte de la esposición "Artistes pola Oficialidá" un actu pal que se cuenta cola presentación del actor de teatru Antón Caamaño y de la Galería d'arte Octógono. Les obres, de más de 50 artistes distintos, van salir a la puya a beneficiu de les actividaes del Conceyu Abiertu pola Oficialidá con precios de salida ente los 30 y los 1.200 euros.

Too ello nel marcu d'una xornada de reivindicación asturianista que va rematar con música al coincidir esi mesmu día l'actuación del grupu musical "Dixebra" que van tocar na Plaza'l Parche d'Avilés dende les 9 nun conciertu especial del que va salir el DVD col que la banda va celebrar los sos venti años de trayectoria.