Gobiernu, sindicatos y patronal firmen el nuevu alcuerdu social

"El presidente del Principáu, Vicente Ávarez Areces, mostróse convencíu de que les fuercies polítiques van dar el apoyu necesariu nel marcu de la prórroga presupuestaria, pa garantizar la financiación plena del nuevu alcuerdu pa la Competitividá, l'Emplegu y el Bienestar Social (Aceba).

Areces fizo estes declaraciones na so intervención, tres firmar n'Uviéu l'Aceba 2008-2011 col secretariu xeneral d'UXT Asturies, Justo Rodríguez Braga, el secretariu xeneral de CC.OO Asturies, Antiono Pino y el presidente de la Federación Asturiana d'Empresarios (FADE), Severino García Vigón. Amás del Aceba, el presidente del Principáu y los secretarios xenerales d'UXT y CC.OO firmaron alcuerdos pa la sostenibilidá de los sistemes educativos y sanitarios.

Areces mostró esa confianza nes fuercies polítiques señalando qu'aprobando los creitos necesarios ""van velar pol interés xeneral"", dao que l'alcuerdu ""beneficia a Asturies"".

Areces refirióse al Acebe como un alcuerdu ""mui ambiciosu"" que contempla les polítiques de los países más avanzaos d'Europa. Agradeció a tolos firmantes el ""esfuerciu"", asina como al equipu del Gobiernu, encabezáu pol conseyeru d'Industria. Gracia Torre. ""Eso sí, nun-y vamos subir el sueldu, porque hai que ser austeros nesti escenariu de prollongación presupuestaria"", bromiar Areces.

Nel marcu temporal del Aceba 2008-2011, tanto a lo que se refier a la financiación prevista nes diferentes llinies d'actuación alcordaes como a les inversioens públiques, el Gobiernu garantiza la financiación de, polo menos, el 75 por cientu de los recursos globales asignaos, nel supuestu de que en dalgún exerciciu s'utilice la prollongación presupuestaria.

El documentu firmáu esti vienres reedita l'alcuerdu ente Gobiernu y axentes sociales y empresariales en materia de promoción económica, emplegu, formación, prevención de riesgos y salú llaboral, vivienda, cohexón social y tamién en cuantes al desarrollu de suelu industrial, apoya la internacionalización a la empresa asturiana, fomentu d'emprendedores, I+D+i y estensión de la Sociedá de la Información. Estes partíes incluyen cientos de midíes y actuaciones de les que la execución suma 1.372.138.372.

Nel 2008, les partíes van ser de 33,8 millones pa promoción económica, 12 millones pa suelu industrial, siete millones pa internacionalización, 18,7 millones pa fomentu d'emprendedores, 37,5 millones pa I+D+i, 14,3 millones pa sociedá de la información, 47 millones pa emplegu, 26,5 millones pa formación, cinco millones pa prevención de riesgos y salú llaboral, 42,5 millones pa vivienda y 73 millones pa cohexón social. Pa los siguientes años contémplase una previsión de recursos de 337,2 millones (2009), 348,4 millones (2010) y 356,2 millones (2011).

Polo que respecta a la previsión d'inversión pública, l'Aceba prevé 2.319 millones repartíos nos proyectos de Zalia. Urbanizaciones y viviendes (446,7 millones), carreteres y infraestructures (906,5 millones), saniamientu, abastecimientu y infraestructures lligaes al mediu Ambiente (480,6 milllones) y infraestructures lligaes a la prestación de servicios públicos (485 millones).

L'Aceba inclúi como anexu un compromisu pola sostenibilidá y la calidá del sistema sanitariu asturianu que contién un análisis someru de la situación, los retos a los que tien de facer frente'l sistema sanitariu n'Asturies y revisa los llogros del anterior alcuerdu (Adece), pa finalmente enunciar les llinies estratéxiques y seis grandes compromisos de desarrollu. Foi firmáu por sindicatos y Gobiernu, pero non por empresarios.

Pretende actualizar el Plan de Salú, ellaborar la llei de Salú y ordenación de Servicios Sanitarios, ellaborar un Plan de Recursos Humanos pal sitema sanitariu, reformar el modelu d'Atención Continuada, ellaborar un plan sociosanitariu y caltener a lo llargo de la llexislatura unos niveles d'inversión nel sistema que permitan meyorar la rede.

Al igual que nel apartáu anterior, l'alcuerdu pa la sostenibilidá del sistema educativu foi firmáu pol Gobiernu y sindicatos, pero non polos empresarios. Los firmantes señalen que la educación ye un derechu fundalmental de les persones y que ye un importante instrumentu de cohexón social.

Ente les midíes comprometíes tán el cumplimentu de los oxetivos europeos, xeneralizar l'usu de les tecnoloxíes de la información nes aules, potenciar les enseñances de los idiomes, xeneralizar progresivamente'l ciclu 0-3 años p'algamar el 34% de la escolarización, evaluar la calidá de los sistemes educativos al traviés de los sos resultaos, fomentar la participación de les families, meyorar el clima de convivencia y de disciplina nos centros, fomentar el trabayu n'equipu en profesoráu, incentivar titulaciones universitaries competittives y asitise en sobre un 2% del PIB nel marcu de la política d'I+D+i.

Nel actu de la firma de güei tuvieron presentes, amás, el conseyeru d'Industria, Gracion Torre, el de Salú, Ramón Quirós, el d'Infraestructures, Francisco González Buendía y la conseyera de Mediu Ambiente Belén Fernádnez. Areces dixo que'l de güei yera ún de los díes de mayor satisfaición nel so mandatu.

Pela so parte, los sindicatos CC.OO y UXT apelaron a la ""xenerosidá"" del Parlamentu asturianu pa qu'apruebe les partíes necesaries pa financiar los proyectos incluyíos nel Alcuerdu pal Desarrollu Económicu, la Competitividá, l'Emplegu y el Bienestar Social (Aceba), debío al actual escenariu de prollongación presupuestaria.

Asina lo punxeron de manifiestu'l secretariu xeneral de CC.OO, Antonio Pino, y el secretariu xeneral d'UXT, Justo Rodríguez Braga, nes sos intervenciones demientres l'actu oficial de la firma del Aceba, onde tamién tuvieron presentes el presidente el Principáu, Vicente Álvarez Areces y el presidente de la Federación Asturiana d'Empresarios d'Asturies (FADE), Serverino García Vigón.

Antiono Pino señaló que'l Aceba ye un ""bon alcuerdu"" y ta ""bien dotáu"" en propuestes y económicamente. Asina, señaló que ante'l ""pocu conveniente"" escenariu políticu actual, en relación a la prollongación presupuestaria, mostróse convencíu de que les fuercies polítiques van tomar les deciciones oportunes ""en favor del interés xeneral"" porque l'alcuerdu va sirvir pal desarrollu económicu y l'emplegu na "".

Pela so parte, Justo Rodríguez Braga dixo que l'alcuerdu nun pretende ""en nengún casu"" facer el trabayu políticu y el llabor del parlamentu asturianu. ""Mui al contrario, va precisar del apoyu y la xenerosidá de los partíos representaos na Xunta Xeneral pa executar les polítiques nél conteníes, o l'apoyu presupuestariu que necesiten"", señaló.

Nel marcu temporal del Aceba 2008-2011, tanto no que se refier a la financiación prevista nes diferentes llinies d'actuación alcordaes como a les inversiones públiques, el Gobiernu garantiza la financiación de, polo menos, el 75 por cientu de los recursos globales asignaos, nel supuestu de que en dalgún exerciciu s'use la prollongación presupuestaria.

Los sindicalistes nun aforraron tampoco crítiques al representante de los empresarios, Severino García Vigón, por non firmar los alcuerdos pa la sostenibilidá de los sistemes educativu y sanitariu. Anonio Pino llamentó asina l'ausencia de FADE na firma.

Pela so parte, Justo Rodríguez Braga esplicó que foi'l presidente del Principáu quien convidó a les partes a realizar propuestes y que FADE nun fizo nenguna. ""Yera bono que toos deseáramos la eficiencia de los sistemes públicos"", reprochó a los empresarios."