El Crossroad festival cola pa La Pola Siero

El Crossroad Festival, certame de música de blues y rock qu'organiza'l promotor Kike "Louie" presentó ayeri la so IV edición, na que'l festival reduz presupuestu y y díes pa concentrar toles actuaciones nún solu día, dexando amás la ciudá de Xixón p'asitiase nel mercáu de ganáu de la Pola Siero.

El día del festival va ser el 22 de xunetu, con un programa concentráu de 4 conciertos nos que rescampla la presencia de Bo Diddley, ún de los grandes veteranos de la música popular rock y blues que, con más de 40 años enriba los escenarios, va compartir cartel con "The Fabulous Thunderbirds" formación de blues eléctricu y rock de Texas que va venir acompañada del guitarrista Nick Curran, la pianista de rythm and blues de Nueva Orleans Marcia Ball y el grupu español "Los Enemigos" de Josele Santiago, que va dar nel Crossroad ún de los pocos conciertos de la minixira que volvió a axuntar al grupu con motivu del so 20.º aniversariu.

Les entraes, que tan a la venta nel portal TickTackTicket, cuesten 50 euros en venta anticipada y van tar en ventanu'l día del conciertu a 65 euros. Kike "Louie" alma del festival que l'añu pasáu decidió facer un apueste atrevíu programando un certame de trés díes con presencia de figures como Willy DeVille o Little Richard, pero que nun tuvo la rempuesta que se contaba por parte del públicu, declaró que l'asitiamientu en Siero del Festival pue repetise pa otros años y qu'ente los sos oxetivos ta'l volver a ampliar cartel y díes de festival. Otramiente, el promotor adelantó que les actuaciones d'esti CrossRoad 2006 van ser más llargues que n'anteriores ediciones, evitando asina la sensación que se tien davezu nesti tipu de certames musicales onde los horarios obliguen a los artistes a dar actuaciones demasiao curties.