Una gaita de cine

El gaiteru Roberto Junquera va espublizar un discu de versiones de bandes
sonores tocaes cola gaita. Dirty Dancing, Flashdance o La Bella y la Bestia son
dalgunos de los cantares de sobra conocíos por tol mundu qu'a partir
d'agora va haber la posibilidá de sentir col soníu de la gaita
asturiana.



El discu va tar nes tiendes pa primeros de xunu y espublízalu la casa de
discos Grabaciones Pola. La responsabilidá sobre esti trabayu
discográficu ye principalmente de
Roberto Junquera,
qu'amás de gaiteru, tamién ye técnicu de soníu y
teclista nel grupu Avalanch. Él
encargóse de tocar la gaita, grabar, mezclar y masterizar el cd, anque
contó cola collaboración de Pablo Carrera cola gaita nun par de
temes, Ross Gala col vigulín n'otru y Dany León cola guitarra
eléctrica n'otros trés. El discu va tener doce cortes con
versiones de temes de películes como Flashdance, La historia
interminable, Carros de fueu, Superdetective n'Hollywood o Dirty dancing ente
otres. Pa facese una idega de lo que vamos poder sentir nesti discu,
entituláu "Una gaita....de cine",
nesta
dirección se pueden sentir dalgunes muestres de los cantares del
discu.