Matabuena llogró un puntu pal Sporting

"El Sporting de Xixó arrancó del campu d'El Arcángel un puntu con sabor a trunfu. Los asturianos marcharon al descansu con dos goles de desventaya en marcador y con un xugador menos pola espulsión de Míchel, pero nun segundu tiempu en que l'equipu revolucionó dafechu, Matabuena apaeció pa marcar dos goles pola heróica nel últimu cuartu d'hora que salvaben los trastes del equipu de Manolo Preciado. El Sporting sigue en puestu d'ascensu y aprovéchase amás de los pinchazos de los sos sguidores más peligrosos, Celta y Real Sociedá, pa poner otru puntu más de difereiencia con ellos.

El partíu entamó con ocasiones pa los dos equipos, anque'l Sporting garró bien ceo'l mandu. Sicasí, la espulsión de Michel por una entrada a Endika cola plantiya per delantre condicionó'l xuegu dende'l minutu 20, dando-y fuelgu a un Córdoba qu'entamó a poner a preba a Roberto. El porteru del Sporting arrebatió dellos tiros complicaos, pero enantes del descansu Javi Moreno fizo'l primeru llibre de marca dende dientro del área y Juanlu marcó'l segundu nun tiru bien guapu dende más de 20 metros. Nel segundu tiempu Preciado dio entrada a Mate Bilic, el delanmteru croata que vuelve al Sporting trés años dempués. Sicasí foi un xugador de perfil muncho menos atacante'l que diba salvar el partíu. Matabuena, que llevaba tol partíu forzáu al tener qu'encargase de la so faza de campu y de la del espulsáu Michel, apaeció providencialmente y marcó dos goles en trés minutos, quedando pa la galería'l segundu, n'otru tiru a distancia que'l porteru del Córdoba nun pudo goler. El partíu, yá rotu, acabó con una ocasión pa cada equipu, la del Sporting pa un Bilic qu'obligó a Valle a atayar con dificultaes."