La Xunta Pola Defensa de la Llingua denunció que s’iguale “oficialidá con imposición”

Con motivu de la tradicional manifestación del Día de les Lletres asturianes, la Xunta Pola Defensa de la Llingua lleó un comunicáu en que fizo balance de lo que supunxo l'añu pa la llingua del país.

La Xunta centró'l so discursu nel terrén de los derechos civiles al esixir que se reconoza "la posibilidá llegal d'usar la llingua propia en cualquier situación de la vida" n'alusión a les múltiples situaciones que se dieron a lo llargo de los últimos meses nes que nun se quixeron almitir documentos en delles instancies y alministraciones por tar n'asturianu. Nacho González, en representación de la Xunta Pola Defensa de la Llingua afirmó nesti sentíu que "nun vamos consentir "que se mienta y se quiera embabucar a la xente" col argumentu de que se quier imponer l'asturianu cuando de fechu "ye illegal usar cualquier otra llingua que nun sía'l castellanu".

Sicasí, el discursu oficial de la Xunta pola Defensa de la Llingua Asturiana reconoció los avances na promoción del asturianu, afirmando que "bien ta que s'oficialice la nuesa toponimia, qu'aumenten los presupuestos pal nuesu idioma" pero siempre afitando que "promoción y oficialidá, voluntariedá y oficialidá nun son conceptos escluyentes" y cola idea central de que "La oficialidá nun ye imposición" en rempuesta al discursu nesti sentíu de les directives del PSOE y del PP.

La perspectiva de la reforma del estatutu d'autonomía d'Asturies tamién centró'l discursu añal de la Xunta que dixo que "refórmese l'estatutu d'equí a dos meses o d'equí a dos años, con pactu ente los partíos mayoritarios o ensin él, fagan lo que fagan, un estatutu ensin oficialidá diba ser un fraude, una burlla" ello sobremanera nun contestu nel que "la oficialidá ye l'únicu tema social y cultural que se vien reivindicando en tolos debates estatutarios y ye'l que vien movilizando nestes décades a más xente y a más entidaes y asociaciones".

Ver equí'l discursu completu