Ana Rosa Migoya valora en positivo la política llingüística del so gobiernu

La Conseyera de Cultura Ana Rosa Migoya inauguró esta mañana de manera oficial la XXVII "Selmana de les Lletres Asturianes" que vien celebrando los sos actos dende'l pasáu vienres y que va espurrise hasta'l 7 de mayu.

Migoya defendió l'éxitu de la edición 2005 de la Selmana de les Lletres pa volver a dedicá-y la celebración a un xéneru y non a un autor concretu. Nuna intervención lleida n'asturianu Migoya defendió'l teatru como "ún de los xéneros más representativos de la nuestra lliteratura y como "l'espectáculu por escelencia". Tocante a la programación d'esta Selmana, Ana Rosa Migoya esplicó que se tentó de facer una "Selmana pa tolos públicos" atendiendo a tolos xéneros "dende'l popular y tradicional hasta'l teatru contemporaneu asturianu, español y estranxeru".

Otramiente, Migoya emponderó'llabor del so gobiernu en cuestión de Política Llingüística definiendo'l Plan de Normalización Social del Asturianu 2005-2007 como "una ferramienta positiva pal asturianu" que val pa "avanzar en sintonía cola realidá política y social asturiana". Les cifres de presupuestu de Política Llingüística, que pasaron de 1,25 millones d'euros al entamu de la llexislatura a los 2,06 millones, lo que supunxo una xuba del 65% lo mesmo que los 8,5 millones d'euros conseñaos en Plan de Normalización Social foron dellos datos apurríos pola Conseyera pa xustificar la so xestión, na que tamién dixo que se dieron "avances sustanciales" en materia de toponimia y edición de llibros.